A nova estación de autobuses de A Coruña abrirá en poucas semanas mentres medra a presión polo transporte metropolitano
A nova estación de autobuses da intermodal de A Coruña encara xa a recta final para a súa apertura. A Xunta prevé que a terminal entre en funcionamento en poucas semanas, cun prazo aproximado de menos dun mes, segundo avanzou o conselleiro de Presidencia, Xustiza e Deportes, Diego Calvo.
A infraestrutura leva as obras rematadas desde comezos deste ano, pero a súa posta en marcha quedou pendente da resolución da xestión do recinto. A Xunta sacou adiante en xuño a licitación da concesión despois de non alcanzar un acordo co Concello da Coruña para asumir a explotación da nova terminal. Agora existe unha oferta presentada por unha empresa externa, á espera de que se complete o proceso.
A nova estación forma parte do complexo intermodal de San Cristóbal e foi concibida para concentrar nun mesmo espazo os servizos de autobús e a conexión ferroviaria. O convenio entre Xunta, Concello e ADIF contempla tanto a terminal como o aparcamento e os elementos comúns da remodelación da estación ferroviaria, cun investimento global estimado de máis de 43,2 millóns de euros.
Unha apertura que chega no medio das queixas polo bus
A entrada en funcionamento da nova terminal producirase nun momento especialmente delicado para o transporte metropolitano da comarca. Nas últimas semanas multiplicáronse as reclamacións por autobuses cheos, viaxeiros que quedan nas paradas, atrasos e frecuencias que non dan resposta á demanda existente. Os problemas concéntranse especialmente en corredores como A Coruña-Oleiros-Sada-Betanzos-Miño e nas conexións con Arteixo e a Costa da Morte.
A propia Xunta recoñece que existen dificultades nas horas punta. Diego Calvo sinalou que o contrato actualmente en vigor ten limitacións para responder ao aumento de usuarios e asegurou que a demanda do transporte público por estrada medrou máis dun 70% desde a entrada en funcionamento dos contratos actuais. O Goberno galego asegura que está reforzando as rutas con maior presión, pero polo momento non prevé unha modificación xeral do servizo.
As explicacións non convencen aos usuarios afectados, que consideran que non sempre é posible adiantar ou atrasar unha viaxe para evitar as horas de maior demanda. A situación levou tamén a varios concellos a reclamar cambios e unha mellor planificación das liñas.
Máis presión desde o inicio do curso
A problemática esténdese a diferentes puntos da área. En setembro xa se denunciaban dificultades en municipios como Oleiros, Sada, Betanzos, Cambre, Culleredo e Arteixo, con especial incidencia nas primeiras horas da mañá e nos momentos de saída dos centros educativos e dos postos de traballo.
A situación volveu quedar patente esta mesma semana en Miño, onde familias e veciñanza protestaron pola falta de prazas nos autobuses que trasladan estudantes cara aos institutos de Betanzos. Máis de 15 alumnos quedan diariamente sen poder acceder ao servizo, segundo as denuncias realizadas nesta nova protesta.
O aparcamento e o futuro da estación actual
Outro dos asuntos pendentes é o aparcamento asociado á intermodal. A Xunta asegura que xa o puxo á disposición de ADIF, mentres continúa sen estar definida a súa xestión definitiva. O aparcamento foi ampliado no proxecto ata superar as 560 prazas.
Tamén queda por decidir que ocorrerá coa parcela que ocupa actualmente a estación de autobuses. Xunta e Concello deberán negociar o seu futuro mentres avanzan os trámites para trasladar os servizos á nova terminal.
A apertura da estación permitirá así dar un novo paso na integración do transporte público da cidade, pero a súa posta en funcionamento chegará cunha cuestión aínda sen resolver: se a nova infraestrutura será capaz de acompañar o incremento da demanda que está a poñer contra as cordas as liñas metropolitanas.