Cinco novos pozos permitirán achegar máis dun millón de litros de auga ao día á rede de Curtis
Máis dun millón de litros de auga ao día poderán incorporarse á rede de abastecemento municipal grazas á execución de cinco novos pozos de captación de augas subterráneas. A actuación permitirá reforzar os recursos dispoñibles para facer fronte á situación de prealerta por escaseza na cunca do río Mandeo.
O investimento supera os 25.000 euros e a previsión do Concello é conectar os cinco pozos á rede nos vindeiros días. A nova achega permitirá subministrar auga ao polígono industrial de Teixeiro e á estación de tratamento de auga potable (ETAP) da Ratona.
A actuación chega despois das medidas adoptadas nas últimas semanas para tratar de garantir o abastecemento ante a caída das reservas. De feito, o Concello xa solicitara ás empresas con maiores consumos unha redución proporcional do uso da auga e puxera en marcha unha captación provisional no encoro da Castellana, onde as bombas situadas no bordo quedaron practicamente varadas pola seca.
A conexión chegará nos próximos días
Os cinco pozos xa foron executados e, antes da súa incorporación ao sistema de abastecemento, realizáronse durante varias xornadas vertidos á rede de pluviais seguindo as indicacións do persoal técnico.
Unha vez completadas estas comprobacións, a previsión municipal é que a nova captación quede conectada á rede nos próximos días e permita sumar máis de 1.000 metros cúbicos diarios, unha cantidade equivalente a máis dun millón de litros.
O Concello continúa, ao mesmo tempo, aplicando as medidas de restrición de consumo establecidas ante a escaseza. Entre elas mantense a prohibición de encher piscinas privadas, lavar vehículos, regar hortas e xardíns ou empregar a auga da rede para labores de limpeza non sanitarios.
Estas limitacións xa foran comunicadas pola Administración local durante o verán ante o descenso das reservas e o risco de que a situación puidese afectar ao abastecemento.
Petición de aforro tamén ás empresas
A situación levou igualmente ao Concello a pedir ás empresas do polígono de Teixeiro que reduzan proporcionalmente o seu consumo. A finalidade é dobre: garantir a dispoñibilidade de auga para a poboación e evitar que a falta de recursos comprometa a actividade das empresas instaladas na zona.
Segundo o Concello, a colaboración das industrias está contribuíndo a estabilizar os recursos dispoñibles no encoro da Castellana, unha das fontes vinculadas ao abastecemento do polígono.
A pesar do escenario de escaseza, o servizo de abastecemento mantense sen incidencias salientables e non se rexistraron cortes de auga. Coa incorporación dos cinco novos pozos, o municipio busca aumentar a súa capacidade de resposta e dispoñer de máis recursos mentres se manteñan as condicións de seca.