Un bando urxente restrinxe o uso de auga potable en Curtis para evitar cortes de subministro
A seca comeza a facer mella no rural e obriga a tomar medidas drásticas. O Concello trasladou un bando urxente no que se establecen severas limitacións ao consumo de auga de cara ás vindeiras semanas. O obxectivo prioritario que persegue o goberno local con esta intervención é salvagardar o abastecemento domiciliario e garantir que haxa recursos hídricos dabondo para o consumo humano a curto e medio prazo.
A drástica caída das reservas acumuladas, provocada pola alarmante falta de choivas, motivou que o Concello declare a prohibición total de empregar auga potable da rede pública para calquera fin recreativo, ornamental ou de limpeza. Con esta directriz na man, dende este mesmo momento e ata novo aviso, non se permitirá encher piscinas particulares nin tampouco lavar vehículos, agás que esta última tarefa se realice en talleres ou lavadoiros profesionais autorizados. Do mesmo xeito, as novas normas vetan o emprego de mangueiras para a limpeza de fachadas, terrazas, patios ou beirarrúas, así como o rego de calquera tipo de xardíns e hortas, sexan estes de de carácter público ou privado.
Dende a casa do concello faise un chamamento á máxima responsabilidade no ámbito doméstico para evitar ter que tomar medidas máis restritivas non desexadas. Esta petición esténdese con especial énfase aos sectores económicos esenciais do municipio, instando aos responsables das industrias e das explotacións gandeiras locais a racionalizar o consumo de auga nos seus procesos de traballo diario e a poñer en práctica todos os mecanismos de aforro e reutilización que resulten viables nas súas instalacións.