Betanzos presenta a súa folla de ruta para definir o futuro do municipio ata 2030
O Concello de Betanzos presentou o Plan de Acción Local da Axenda Urbana 2030, un documento estratéxico que establecerá as prioridades municipais e o modelo de crecemento da localidade durante os vindeiros anos. A proposta, que se levará ao pleno do vindeiro martes, integra actuacións en urbanismo, mobilidade, vivenda, medio ambiente, economía local, inclusión social e innovación dixital.
A alcaldesa, María Barral, explicou que a Axenda Urbana permitirá definir que modelo de cidade quere construír Betanzos e establecer unha folla de ruta para acadar eses obxectivos. Segundo sinalou, o documento tamén busca mellorar as posibilidades de acceder a financiamento europeo, estatal e autonómico para desenvolver proxectos municipais.
O plan adapta á realidade local os dez obxectivos estratéxicos da Axenda Urbana Española, aliñados coa Axenda 2030 das Nacións Unidas e coa Axenda Urbana da Unión Europea. Entre as súas prioridades figuran a ordenación do territorio, a rexeneración urbana, a loita contra o cambio climático, a mobilidade sostible, a cohesión social, o acceso á vivenda e a modernización da Administración.
Rexeneración urbana, vivenda e protección da contorna
O diagnóstico municipal identifica desafíos como o envellecemento da poboación e do parque de edificios, a existencia de vivendas baleiras, as diferenzas entre o núcleo urbano e as parroquias rurais, o risco de inundacións e a fenda dixital. Fronte a estas cuestións, o documento sinala como fortalezas o patrimonio histórico, os ríos Mendo e Mandeo, a Reserva da Biosfera Mariñas Coruñesas e Terras do Mandeo, a estrutura compacta da localidade e a posición do polígono industrial de Piadela.
Entre os proxectos previstos figura a aprobación definitiva do novo Plan Xeral de Ordenación Municipal (PXOM), que contempla unha redución do solo urbanizable respecto das Normas Subsidiarias de 1996. Tamén se inclúen o Anel Verde e Azul, destinado a conectar a localidade coa ría, o río Mandeo e as parroquias rurais, e a recuperación da contorna do Pasatempo.
En materia de rexeneración urbana, o plan propón impulsar áreas de rehabilitación integral no casco histórico e transformar o Mercado Municipal nun espazo multifuncional que combine actividade comercial, cultura e encontro social.
A transición enerxética e a adaptación ao cambio climático constitúen outro dos eixes de actuación. Entre as medidas previstas atópanse unha planta solar municipal no Carregal para autoconsumo, a instalación de composteiros comunitarios, a creación dunha oficina municipal de enerxía e economía circular, sistemas de drenaxe sostible en zonas expostas a inundacións e unha rede de refuxios climáticos.
No ámbito da mobilidade, contémplanse itinerarios peonís e ciclistas, camiños escolares seguros e o desenvolvemento do Plan de Mobilidade Urbana Sostible.
Medidas para impulsar a economía e a cohesión social
A Axenda Urbana tamén formula medidas para facilitar o acceso á vivenda, como mobilizar inmobles baleiros cara ao alugueiro alcanzable mediante acordos coas persoas propietarias e garantías públicas, ademais de reforzar o parque público residencial.
Para dinamizar a economía local, proponse crear viveiros de empresas e espazos de traballo compartido, impulsar a dixitalización do comercio de proximidade, mellorar o polígono de Piadela e desenvolver rutas turísticas apoiadas nas novas tecnoloxías.
No ámbito social, o documento inclúe o reforzo da atención domiciliaria, a creación de espazos de encontro para combater a soidade non desexada e unha bolsa municipal de emprego. Tamén prevé modernizar a Administración electrónica, ofrecer formación para reducir a fenda dixital, promover orzamentos participativos e desenvolver un plan integral de comunicación.
Dez mesas de traballo para supervisar o plan
A proposta que se someterá ao pleno inclúe a creación de dez mesas sectoriais de traballo, unha por cada obxectivo estratéxico. Estarán presididas polo concelleiro ou concelleira responsable de cada área e contarán con persoal técnico municipal, representantes dos grupos políticos e integrantes de asociacións veciñais, profesionais, empresariais e sociais.
Barral defendeu que a Axenda Urbana debe ser un documento aberto ás achegas da cidadanía e revisarse a medida que avance a súa execución.
Se o pleno aproba a proposta, o plan someterase a información pública durante vinte días hábiles, mediante un anuncio no Boletín Oficial da Provincia da Coruña e no taboleiro de edictos municipal. A documentación estará dispoñible na web do Concello e na súa sede electrónica, e calquera persoa física ou xurídica poderá consultala e presentar alegacións ou suxestións.
Ademais, o Concello solicitará a opinión das principais asociacións veciñais, profesionais, sindicais e sectoriais. O documento terá carácter flexible e poderá actualizarse en función dos indicadores de seguimento e das posibilidades de financiamento de cada proxecto.