Betanzos considera insuficientes os novos autobuses directos coa Coruña e reclama máis melloras
A incorporación de dous autobuses directos entre Betanzos e A Coruña supón un avance para parte das persoas usuarias, pero está lonxe de resolver os problemas que arrastra o transporte metropolitano na comarca. A alcaldesa de Betanzos, María Barral, valorou positivamente os novos servizos, aínda que advertiu de que representan só unha pequena parte das melloras que levan tempo reclamando tanto o Concello como outros municipios da contorna.
As novas conexións inclúen unha saída directa de Betanzos ás 6:50 horas, que substitúe o servizo das 7:00, e unha viaxe de regreso desde A Coruña ás 15:30. A rexedora considera que o primeiro horario resulta axeitado para as persoas que comezan a súa xornada laboral ás 8:00, pero non responde ás necesidades doutros colectivos. Entre eles citou o alumnado que entra ás 9:00 na universidade, que tería que chegar á cidade con demasiada antelación, e as persoas con citas médicas ás 10:00 nos hospitais coruñeses.
Barral insiste en que continúan sen solución cuestións que xa foron trasladadas á Xunta: a falta de frecuencias en determinadas franxas, os autobuses que circulan completos e deixan persoas nas paradas, os atrasos e os servizos que non chegan a realizar algunhas paradas. Tamén reclama información clara sobre os horarios e os tempos de espera, especialmente para as persoas que non utilizan internet. A situación da parada de Alfonso Molina, onde conflúen os servizos da universidade, Alvedro e Betanzos, segue a ser outro dos puntos de preocupación municipal.
A alcaldesa lembra que estas demandas non son exclusivas de Betanzos. En setembro, sete concellos da comarca coordinaron as súas reivindicacións ante as deficiencias do transporte metropolitano, entre elas a saturación dos vehículos, a falta de regularidade e a ausencia de información fiable. O Concello tamén denunciara incidencias concretas, como a do autobús das 8:00 que non pasou pola parada o pasado setembro e deixou sen transporte a persoas que se desprazaban por motivos laborais, educativos ou médicos.
O goberno local continúa á espera dunha reunión coa Dirección Xeral de Mobilidade para analizar o funcionamento das liñas e abordar o conxunto das reclamacións. Segundo lembra Barral, a directora xeral, Judit Fontela, comprometeuse a manter ese encontro durante a reunión do pasado 29 de outubro. A alcaldesa pide que a cita se concrete canto antes e que se traduza en medidas máis amplas ca os dous novos servizos.
A rexedora tamén cuestionou como se comunicou a incorporación dos autobuses. Segundo indicou, na reunión coa Xunta na que participaron os alcaldes e alcaldesas non se lles informou do cambio, mentres que o PP de Betanzos e o de Miño xa anunciaran a proposta o 3 de novembro. Precisamente, o Partido Popular de Betanzos trasladara á Dirección Xeral de Mobilidade a petición de establecer unha saída directa ás 6:50 e outra de regreso ás 15:30.