Emprego | Empresa e industria | Sindicatos

A CIG acusa á patronal de manter unha postura inmobilista e confirma que continúan convocadas as folgas previstas para finais de xuño e comezos de xullo

A segunda xornada da mediación entre a representación sindical e a patronal do sector siderometalúrxico da provincia da Coruña concluíu este xoves sen avances significativos que permitan desbloquear a negociación do convenio colectivo. Así o denunciou a CIG-Industria, que acusa á representación empresarial de manter unha postura 'inmobilista' nas cuestións que considera fundamentais para alcanzar un acordo.

Segundo explica a central sindical, durante a reunión apenas se produciron pequenos avances en aspectos secundarios da negociación, mentres continúan sen resposta demandas como a redución da xornada laboral, a mellora salarial, a revisión dos salarios, a regulación do persoal fixo descontinuo, a subcontratación ou a actualización do plus penoso, tóxico e perigoso.

Desde a CIG tamén critican que a patronal dese por rematada a reunión ás 18.00 horas sen responder á última proposta presentada pola parte social durante a tarde, que tiña como obxectivo favorecer un achegamento entre ambas as partes.

A mediación continuará este venres durante toda a mañá e o sindicato agarda que a representación empresarial modifique a súa posición e entre a negociar os aspectos que consideran esenciais para pechar un novo convenio.

A organización sindical denuncia, ademais, que o proceso se está prolongando de forma inxustificada por responsabilidade exclusiva da patronal. Neste sentido, asegura que durante as sesións de mediación chegan a producirse recesos superiores ás dúas horas sen que iso se traduza en avances reais nas materias centrais da negociación.

A CIG lembra que o proceso de mediación finalizará, con ou sen acordo, na mañá do vindeiro luns 29 de xuño. Por iso, fai un novo chamamento á patronal para que abandone a súa actitude de bloqueo e afronte a negociación dos puntos principais do convenio colectivo.

Mentres non se produzan avances, o sindicato manterá o calendario de mobilizacións previsto. O luns 29 de xuño celebraranse asembleas nas tres comarcas para informar o persoal sobre o resultado da mediación e analizar a evolución do conflito.

Ademais, continúan convocadas as xornadas de folga dos días 30 de xuño e 2, 7 e 9 de xullo, co obxectivo de lograr un convenio colectivo que mellore as condicións laborais e salariais do conxunto do persoal do sector.