A falta de votación no pleno da FP Básica abre unha nova fronte política en Carral
Alternativa dos Veciños de Carral rexistrou este xoves, 3 de xullo, un escrito no Concello para solicitar explicacións sobre o desenvolvemento do pleno extraordinario celebrado o pasado 25 de xuño, convocado para abordar a implantación da FP Básica de Mantemento de Vehículos no IES Carral.
A formación sinala que na orde do día figuraba como único punto o debate e a adopción dos acordos que procedesen en relación coa chegada deste ciclo ao centro educativo. Por ese motivo, considera que, unha vez rematadas as intervencións, o pleno debía pronunciarse mediante votación sobre as propostas presentadas durante a sesión.
Segundo Alternativa, o alcalde levantou a sesión sen abrir unha quenda de réplica e sen someter a votación ningún dos acordos formulados. A organización entende que esta decisión impediu ao órgano plenario adoptar unha posición formal sobre unha cuestión que nas últimas semanas xerou debate político e preocupación na comunidade educativa.
No escrito presentado, Alternativa pide que o Concello informe por escrito das razóns polas que non se votaron os acordos previstos e que esa explicación sexa trasladada a todos os membros da Corporación municipal. Tamén solicita que, se legalmente procede, as propostas formuladas nesa sesión sexan incluídas na orde do día do seguinte pleno para seren debatidas e votadas.
No caso de que isto non sexa posible, a formación reclama que se indique expresamente a base legal que xustifica que non se sometesen a votación os acordos recollidos na convocatoria. Alternativa defende que a súa petición busca garantir a transparencia institucional, o correcto funcionamento dos órganos municipais e o respecto ás normas que regulan as sesións plenarias.
O debate pola implantación da FP Básica no IES Carral continúa así aberto, despois dun proceso marcado polas dúbidas sobre a planificación do ciclo, os espazos dispoñibles e a participación da comunidade educativa na toma de decisións.