O pleno extraordinario de Carral evidencia o choque político pola FP Básica mentres continúan as dúbidas sobre a súa implantación
O pleno extraordinario celebrado este xoves en Carral para abordar a implantación do ciclo de Formación Profesional Básica de Mantemento de Vehículos no IES do municipio deixou patente a división política sobre o proxecto e as incógnitas que, segundo a oposición, seguen sen resposta. Esta situación espertou unha notable expectación e contou cun salón de plenos completamente cheo de integrantes da comunidade educativa, ademais de veciñanza interesada no futuro do centro. Mesmo varias persoas tiveron que permanecer fóra ao completarse o aforo da sala.
A sesión, solicitada por Alternativa dos Veciños, reuniu a numerosos integrantes da comunidade educativa e veciñanza. O salón de plenos quedou pequeno e varias persoas tiveron que permanecer no exterior ao completarse o aforo.
A portavoz de Alternativa dos Veciños, Rosa Rabuñal, insistiu en que a súa formación non se opón á chegada da FP Básica, senón á forma na que, asegura, se levou a cabo todo o proceso.
'Queremos unha FP de calidade. O que cuestionamos é a imposición, sen diálogo coa dirección do centro, co profesorado, coas familias nin coa oposición', afirmou.
Unha cronoloxía marcada polas présas
Durante a súa intervención, Rabuñal reconstruíu a cronoloxía dos feitos desde o pasado mes de maio. Segundo explicou, o director do IES recibiu o 12 de maio unha chamada da Xunta para decidir practicamente dun día para outro a instalación dunha aula provisional.
Posteriormente producíronse distintas reunións coa Consellería e co Concello, nas que, segundo indicou, a dirección trasladou as súas dúbidas sobre a falta de planificación e de espazos. A pesar diso, o ciclo acabou incluído na oferta oficial de Formación Profesional publicada pola Xunta.
A portavoz asegurou que tanto o claustro como a dirección do centro remitiron escritos á Administración autonómica advertindo de que non se opoñían á implantación da FP, pero reclamaban máis información e unha planificación adecuada antes da súa posta en marcha.
As dúbidas sobre os espazos
Boa parte do debate centrouse nas condicións nas que se desenvolverá o ciclo.
Alternativa cuestionou onde se situarán os talleres necesarios para impartir unha formación de mantemento de vehículos, ademais dos espazos destinados ao almacenamento de aceites, residuos, vestiarios ou zonas de prácticas.
A formación tamén preguntou como se organizarán os accesos, os horarios, o transporte escolar ou a convivencia entre o alumnado da ESO e o da FP, especialmente tendo en conta que parte dos estudantes poderán ser maiores de idade.
Segundo Rabuñal, ningunha destas cuestións foi aclarada nin pola Xunta nin polo Concello antes de aprobar a implantación.
O PSOE tamén pide máis planificación
A portavoz socialista, Blanca Fidalgo, coincidiu en boa parte das críticas formuladas por Alternativa e asegurou compartir a preocupación da dirección do instituto.
A concelleira defendeu a Formación Profesional Básica como unha ferramenta fundamental para evitar o abandono escolar, pero advertiu de que o alumnado precisa espazos adecuados e unha integración real dentro do centro.
Tamén cuestionou o anuncio realizado polo alcalde sobre a compra dunha parcela para futuras ampliacións do instituto, asegurando que non existe aínda expediente administrativo nin documentación municipal que acredite esa adquisición.
Fidalgo lamentou igualmente que continúen sen resolverse cuestións relacionadas co transporte escolar, a falta de espazo no instituto ou a futura ampliación do centro.
Mouriño: 'Sería unha irresponsabilidade renunciar a esta oportunidade'
Pola súa banda, o alcalde, Javier Mouriño, defendeu a decisión do Concello de apoiar a implantación da FP Básica.
Segundo explicou, a organización interna do instituto corresponde á Consellería de Educación e ao propio centro, mentres que o Concello colaborará cedendo os terreos necesarios para futuras ampliacións.
O rexedor cualificou a nova titulación como 'unha oportunidade única' para Carral e asegurou que pode converterse no primeiro paso para lograr no futuro máis ciclos formativos, a ampliación do instituto e mesmo a implantación do Bacharelato.
Ademais, comprometeuse a apoiar todas as peticións que formule a dirección do centro respecto ás necesidades de espazo e infraestruturas.
Un pleno sen acordo
O pleno concluíu sen que prosperase a proposta presentada por Alternativa dos Veciños para solicitar á Xunta a paralización da implantación do ciclo ata contar con todos os informes técnicos e coa planificación necesaria.
A sesión rematou nun ambiente de tensión, con protestas entre o público asistente, despois de que o alcalde levantase o pleno antes de que Alternativa puidese intervir no seu último turno de palabra.
O debate supón un novo capítulo dunha polémica que se prolonga desde principios de xuño. Nas últimas semanas, a dirección do IES, o profesorado e as familias manifestaron publicamente que non rexeitan a chegada da FP Básica, pero si reclaman que a súa implantación se faga con garantías, espazos adecuados e maior diálogo entre todas as administracións implicadas.