Concello | Educación

Alternativa pide un pleno extraordinario urxente para abordar a implantación do ciclo no IES, mentres o Concello defende que a formación se impartirá nun espazo independente e sen compartir instalacións coa ESO

A implantación dunha FP Básica de Mantemento de Vehículos no IES de Carral volve situar o debate educativo no centro da actualidade municipal. O centro incorporará esta nova oferta formativa o vindeiro curso, aínda que o goberno local quixo aclarar que as clases non se desenvolverán dentro das instalacións actuais do instituto, senón nun módulo independente situado nunha parcela lindeira de titularidade municipal.

O alcalde, José Luis Fernández Mouriño, explicou que o obxectivo é garantir a convivencia entre o alumnado da nova Formación Profesional e o de Educación Secundaria Obrigatoria, evitando interferencias entre ambas etapas educativas. Segundo precisou o rexedor, a posta en marcha deste ciclo non suporá restar espazo ao instituto, xa que a actividade lectiva se levará a cabo fóra das instalacións propias do centro, nun terreo que actualmente non ten uso.

A aclaración chega despois das dúbidas xurdidas nos últimos días entre a comunidade educativa e tras a solicitude de Alternativa dos Veciños para convocar un pleno extraordinario urxente no que se aborde a implantación desta nova FP. A formación reclamou explicacións ao goberno local sobre o proceso seguido, a situación actual do proxecto e as previsións para a súa posta en marcha, despois de que a nova oferta aparecese recollida na planificación educativa para o próximo curso.

Alternativa valora positivamente que Carral poida ampliar a súa oferta formativa, pero considera imprescindible que unha medida deste alcance conte coa planificación adecuada, co consenso da comunidade educativa e cos recursos e espazos necesarios. Por iso, solicitou que o asunto se trate nunha sesión plenaria específica e pediu que se celebre ás 20.00 horas para facilitar a asistencia do profesorado, das familias e da veciñanza interesada. O grupo tamén anunciou a súa renuncia á compensación económica por asistencia derivada deste pleno extraordinario.

Pola súa banda, o Concello insiste en que a nova FP Básica se organizará de maneira que non altere o funcionamento ordinario do IES. Fernández Mouriño avanzou que o goberno municipal solicitará á Xunta de Galicia a instalación de aseos propios e dun acceso independente para o alumnado deste ciclo, coa finalidade de favorecer unha correcta organización dos espazos e reducir posibles incidencias.

O executivo local tamén promoverá unha coordinación específica para que os horarios lectivos e os períodos de recreo se estruturen de forma que se eviten coincidencias innecesarias co alumnado da ESO. Ademais, o alcalde comprometeuse a trasladar á Administración autonómica calquera necesidade ou proposta que poida formular a dirección do centro ou a propia comunidade educativa.

O ciclo de Mantemento de Vehículos supón a chegada da primeira Formación Profesional Básica ao instituto carralés e está vencellado ao ámbito da automoción. Desde o goberno local defenden que a súa implantación pode abrir novas oportunidades para a mocidade do municipio, tanto no eido formativo como de cara á futura inserción laboral.

En paralelo, o Concello mantén a súa reivindicación do Bacharelato para Carral. Fernández Mouriño lembrou que se trata dunha demanda histórica do municipio e asegurou que o goberno local leva anos trasladándolla á Xunta de Galicia. Con todo, sinalou que, segundo os criterios actuais, Carral non alcanza neste momento as ratios de alumnado e poboación esixidas para autorizar esta etapa educativa.

A pesar diso, o rexedor afirmou que o Concello continuará traballando para solicitar a incorporación do Bacharelato ao instituto. O alcalde considera que o crecemento demográfico que está a experimentar Carral debe ir acompañado dunha ampliación progresiva da oferta educativa e das oportunidades formativas para a mocidade.

Neste sentido, Fernández Mouriño defende que a posta en marcha da FP Básica pode representar un primeiro paso cara á implantación de novos ciclos formativos no municipio. O obxectivo, segundo o goberno local, é avanzar cara a un modelo educativo máis completo, adaptado ás necesidades presentes e futuras de Carral e capaz de ofrecer máis alternativas sen que o alumnado teña que desprazarse a outros concellos.