Vivir entre humidades, calor extremo e auga dentro da casa na urbanización de Pedrapartida
A urbanización de Pedrapartida, en Coirós, está formada por 16 vivendas sociais entregadas a comezos de 2013. As casas foron promovidas pola Xunta como unha opción de acceso á vivenda para persoas con menos recursos, primeiro en réxime de alugueiro e, nalgúns casos, con posterior posibilidade de compra.
Máis dunha década despois, parte da veciñanza denuncia que aqueles fogares arrastran problemas desde o primeiro día. Verónica, unha das residentes, asegura que os desperfectos non se limitan ás filtracións: fala de tellados mal executados, entradas de auga por distintos puntos, falta de illamento térmico, humidades constantes, carpintarías deterioradas e incidencias nas escaleiras interiores.
'A urbanización está rematada desde finais de 2012 e a nós entregáronnos as chaves a partir do 1 de xaneiro de 2013', explica. Segundo relata, ao entrar nas vivendas xa había danos visibles, como azulexos rotos, remates soltos e escaleiras que se movían. 'Sempre houbo humidades desde o principio', resume.
Un dos principais problemas estaría nas cubertas. Verónica afirma que os tellados son planos e que os desaugadoiros están colocados por enriba da superficie, o que fai que a auga quede acumulada. 'Os tellados son chans e os desaugadoiros están varios centímetros por enriba da superficie', sinala. Ao seu xuízo, 'en Galicia isto non serve'.
Cando chove con forza, a situación agrávase no interior das casas. A veciña asegura que cada vivenda sofre as filtracións dun xeito distinto. 'Hai xente á que lle chove polo corredor, outros pola campá extractora, outros polos enchufes e a outros polas ventás. Pero todos temos entradas de auga', denuncia.
O deterioro avanza tamén no interior das vivendas. A presenza continuada de humidade afecta á madeira, aos armarios, á roupa e á habitabilidade diaria das casas. A situación obriga aos residentes a recorrer a deshumidificadores, cubos, toallas ou solucións provisionais cada vez que a choiva entra no interior.
O problema non se reduce a un episodio puntual nin a unha única vivenda. Segundo denuncian, as deficiencias repítense en distintos puntos da urbanización e cada casa sofre as consecuencias dun xeito diferente: auga que cae polos teitos, filtracións nas paredes, entradas polas ventás ou humidade acumulada durante días.
A chegada do mal tempo é agora a principal preocupación. A veciñanza teme que, se non se actúa antes sobre as cubertas e sobre os puntos polos que entra a auga, o inverno volva converter o interior das casas nun espazo difícil de habitar. 'Como volva chover durante meses seguidos, que facemos? Para onde imos?'