Unhas 120 persoas volven saír á rúa en Miño para reclamar un transporte escolar digno
Unhas 120 persoas concentráronse esta mañá na parada de autobús da rúa Galea, en Miño, para reclamar un servizo de transporte escolar digno e eficiente para o alumnado do municipio.
A mobilización, de carácter pacífico, contou coa participación de familias e veciñanza e produciuse ante a situación que se vén rexistrando nas últimas semanas co servizo. As familias reclaman unha solución estable que permita garantir que o alumnado dispoña de prazas suficientes no autobús escolar.
Segundo denuncian os convocantes, durante esta semana o vehículo enviado pola empresa responsable volveu contar con 49 prazas. A situación contrasta co autobús de 60 prazas que fora utilizado anteriormente para atender as necesidades do servizo e que, segundo sinalan, tivo carácter temporal.
Precisamente na xornada desta concentración, a empresa enviou un autobús con maior capacidade. Para as familias, o feito de que se utilizase un vehículo con máis prazas coincidindo coa protesta evidencia que existe capacidade para modificar o servizo cando se producen reclamacións.
As familias reclaman unha solución estable
A mobilización contou co apoio do Concello de Miño, mentres que as familias volven reclamar á Dirección Xeral de Mobilidade da Xunta de Galicia unha resposta ás súas demandas.
Os afectados consideran necesario que a solución non dependa de medidas puntuais ou de cambios no vehículo utilizado determinados días, senón que se estableza un servizo capaz de responder de maneira estable ás necesidades do alumnado.
As familias aseguran que manterán as mobilizacións se non se produce unha resposta ás súas peticións e reivindican un transporte escolar que garanta o servizo tanto para os escolares que utilizan actualmente o autobús como para os que o farán nos próximos anos.