Unha pista de Pump Track e un panel LED, os dous proxectos que sairán dos orzamentos participativos de Bergondo
A veciñanza de Bergondo poderá contar cunha nova pista de Pump Track e cun panel informativo LED grazas aos orzamentos participativos de 2027. Son as dúas actuacións que o Concello decidiu executar tras recibir 52 propostas neste proceso, que permite á cidadanía trasladar ideas para mellorar o municipio.
A iniciativa máis votada foi a instalación dun panel informativo LED, presentada por Juana Elisa Montaos Martínez en nome da Asociación de Mulleres Rurais de Guísamo. O dispositivo servirá para difundir información de servizo e avisos de interese para a veciñanza. A súa localización aínda está pendente de decidir. A autora da proposta recibirá un vale de 100 euros para gastar no comercio local.
O Concello tamén levará adiante a segunda proposta seleccionada: a creación dunha pista de Pump Track, presentada por Silvia Roel Tosende. A decisión responde a que a instalación do panel non esgotará previsiblemente os 100.000 euros reservados para este proceso, polo que o goberno local considera posible acometer tamén a segunda actuación. Neste caso, será necesaria unha achega económica municipal maior para completar o financiamento.
Outras iniciativas veciñais tamén poderán materializarse, aínda que non todas a través dos orzamentos participativos. É o caso da renovación do parque de Moruxo, que se executará igualmente ao tratarse dunha intervención de baixo custo.
Entre as propostas valoradas figura tamén a mellora da ruta de sendeirismo Cambade-Sada. A partir desta idea, o Concello contempla prolongar o paseo fluvial do río Maior ata o límite con Sada, aínda que polo momento non dispón dos terreos necesarios para facelo.
A mellora da praza de O Caño, pola súa banda, xa conta cun orzamento en fase de redacción. Outra das propostas consistía en facilitar o acceso á praia de Gandarío desde A Lagoa, mediante o arranxo das escaleiras próximas á marquesiña do autobús e a construción dunha rampla. Por agora, esta actuación non poderá levarse a cabo pola falta de dispoñibilidade dos terreos.
Tamén se terá en conta para futuras intervencións a proposta de humanizar a contorna da igrexa de Ouces, que inclúe a creación dunha zona de paso seguro para peóns e outras melloras.
Ademais, outras seis persoas participantes recibirán vales de 50 euros para gastar nos establecementos locais polas súas propostas. O goberno municipal sinala que algunhas das ideas recibidas poderán incorporarse a futuros paquetes de investimento ou a solicitudes de subvencións doutras administracións.
Sete edicións dos orzamentos participativos
O proceso de orzamentos participativos alcanza en 2027 a súa sétima edición. O Concello reserva un máximo de 100.000 euros para financiar iniciativas propostas pola cidadanía e destinadas a mellorar o municipio.
Para poder participar era necesario estar empadroado ou residir en Bergondo. Ademais, as propostas debían ser viables, depender das competencias municipais e responder a un interese xeral ou parroquial.
O goberno local aposta por manter este mecanismo como unha vía para coñecer as necesidades da veciñanza e incorporar as súas achegas á planificación dos investimentos municipais.