Unha charla en Curtis abordará as ferramentas para xestionar e aproveitar a terra agraria
O Recinto Feiral de Curtis acollerá este luns 9 de novembro unha charla informativa sobre 'Terra Agraria e Xestión do Territorio', centrada nas ferramentas e oportunidades dispoñibles para mellorar a xestión do territorio e favorecer o desenvolvemento do rural galego.
A sesión comezará ás 12.00 horas e está dirixida especialmente a persoas propietarias de terreos, agricultoras, gandeiras, comunidades de montes e calquera persoa interesada na xestión do territorio.
Arrendamentos, Banco de Terras e montes veciñais
Durante o encontro abordaranse cuestións como os contratos e arrendamentos rústicos, o funcionamento do Banco de Terras de Galicia e os montes veciñais en man común. Tamén se tratarán as posibilidades de mobilidade e aproveitamento da terra agraria, xunto con aspectos prácticos e casos reais.
A charla será impartida por persoal técnico da Consellería do Medio Rural, da Oficina Agraria Comarcal de Teixeiro, especializado en dereito agrario comunitario.
Unha iniciativa da Xunta coa colaboración municipal
A actividade está organizada pola Xunta de Galicia, a través da Consellería do Medio Rural, coa colaboración do Concello de Curtis.
O obxectivo é achegar información práctica sobre os instrumentos de ordenación e mobilización de terras e dar a coñecer as oportunidades que ofrecen para impulsar o medio rural.