Tres concellos reforzan a atención temperá ás familias con servizo compartido ata 2028
As familias de Abegondo, Bergondo e Carral poderán seguir contando co Servizo de Atención Temperá compartido polos tres municipios ata finais de outubro de 2028. O Concello de Abegondo, como representante da agrupación, aprobou en pleno o novo convenio de colaboración que dará continuidade a esta prestación integrada na Rede Galega de Atención Temperá.
O acordo permitirá manter a atención especializada para menores de entre 0 e 6 anos con trastornos do desenvolvemento ou en risco de padecelos, así como para as súas familias e contornos. Os tres concellos xa solicitaron á Xunta a nova subvención económica para garantir a continuidade do programa, unha prestación que está financiada ao 100% pola Administración autonómica.
Durante o período anterior, correspondente aos anos 2024 a 2026, a agrupación recibiu 277.709,15 euros para financiar o servizo. Abegondo continuará exercendo como representante legal dos tres municipios para a tramitación e xestión destas axudas da Consellería de Política Social, cofinanciadas a través do Fondo Social Europeo.
Un equipo especializado para atender as necesidades dos menores
O Servizo de Atención Temperá conta cun equipo interdisciplinar formado por tres profesionais a xornada completa: unha terapeuta ocupacional, unha logopeda e unha psicóloga.
A intervención abrangue diferentes ámbitos do desenvolvemento infantil, entre eles as áreas psicomotora e cognitiva, a linguaxe e a comunicación, a autonomía persoal e os aspectos sociais e afectivos. O equipo tamén realiza tarefas de diagnóstico e valoración e ofrece ás familias apoio, información, habilitación e formación.
O obxectivo é proporcionar unha resposta rápida ás necesidades dos menores e favorecer tanto o desenvolvemento da súa autonomía como a súa inclusión social.
A demanda medrou desde a posta en marcha en 2019
O servizo compartido comezou a funcionar en 2019 e desde entón experimentou un incremento da demanda. Ese primeiro ano foron atendidos 29 menores, mentres que en 2023 a cifra chegou aos 89 expedientes.
Nos dous últimos exercicios recollidos no balance, o programa mantivo tamén un volume elevado de atención, con 83 menores atendidos en 2024 e 75 en 2025.
Os tres concellos consideran que a fórmula de agrupación permite manter unha prestación especializada próxima ás familias e aproveitar os recursos de maneira conxunta, fronte á alternativa dunha xestión independente por parte de cada municipio.