Reabre a estrada entre Suevos e Bens tras finalizar as obras de saneamento
Augas de Galicia rematou este luns as obras de conexión entre o interceptor de Suevos e a EDAR de Bens, unha actuación destinada a resolver os problemas de capacidade da rede de saneamento nesta zona de Arteixo.
Os traballos consistiron na construción dun novo colector desde o areeiro de Suevos ata a estación depuradora de Bens. A infraestrutura permitirá asumir mellor o incremento dos caudais, especialmente durante episodios de chuvias fortes, cando se producían desbordamentos puntuais no areeiro.
A necesidade desta actuación xurdiu tras o aumento das augas conducidas polas tubaxes debido á conexión co polígono de Morás. O colector existente non tiña capacidade suficiente para absorber todo o volume de auga en momentos de precipitacións intensas, o que obrigou a buscar unha solución coordinada entre varias administracións.
O Concello de Arteixo solicitara a colaboración doutras entidades implicadas no tratamento destas augas, o que derivou nun convenio para executar o novo colector. A obra foi realizada por Augas de Galicia e contou cun investimento total de 2,7 millóns de euros.
O financiamento foi asumido por varias administracións. A Consellería de Industria achegou 1.065.000 euros, Xestur contribuíu con 734.000 euros, a Autoridade Portuaria con 518.000 euros e o Concello de Arteixo con 393.000 euros.
A finalización dos traballos tamén permitiu reabrir a estrada que conecta esta parte de Suevos coa praia de Bens e O Portiño da Coruña. O pintado da vía completarase nos próximos días.