Concello | Infraestructuras

O Goberno local defende no pleno que a renovación dos xogos e a instalación da cuberta son dous proxectos independentes e que a financiación prevista non se perdeu

O Goberno local de Betanzos reafirmou no pleno o seu compromiso de que o parque infantil Pintor Seijo Rubio sexa o primeiro espazo de xogos cuberto do municipio. O Executivo municipal explicou que a actuación estaba dividida en dous proxectos diferentes: por unha banda, a renovación dos xogos e da superficie, xa executada, e por outra, a instalación da futura cuberta.

O concelleiro de Obras, Andrés Hermida, sinalou que se decidiu actuar primeiro sobre o parque pola necesidade inmediata de modernizar unha zona moi utilizada polas familias. Segundo indicou, o espazo presentaba desgaste nos elementos de xogo, deterioro no pavimento e precisaba adaptarse ás normas actuais de seguridade e accesibilidade.

A reforma xa realizada permitiu renovar os xogos, o pavimento e as zonas de estancia, co obxectivo de devolver canto antes o uso do parque ás familias en condicións máis seguras. O Goberno local sostén que acometer ao mesmo tempo esta actuación e a cuberta tería suposto unha maior complexidade técnica, máis tempo de peche e unha inversión inicial superior.

Hermida explicou que a futura cuberta require un proxecto propio, con estudos específicos de cimentación, resistencia estrutural, cargas, evacuación de augas pluviais, integración urbanística e adaptación ao contorno. Tamén precisará unha tramitación administrativa e orzamentaria diferenciada.

O Executivo municipal nega que a financiación prevista para esta actuación se perdese e aclara que existía un proxecto inicial de cuberta que agora debe reformularse en prezos e características. Segundo o Goberno local, o feito de ter executado antes a reforma do parque non impide nin condiciona a instalación posterior da estrutura.

A alcaldesa, María Barral, defendeu a xestión realizada e enmarcou esta actuación nun proceso máis amplo de mellora dos espazos públicos e das áreas infantís de Betanzos. A rexedora insistiu en que a cuberta segue a ser un obxectivo municipal, aínda que require unha planificación técnica e económica máis detallada pola singularidade da obra.

Barral subliñou que o futuro parque cuberto de Pintor Seijo Rubio será unha infraestrutura pioneira na cidade e permitirá ás familias utilizar este espazo durante todo o ano, especialmente nos meses de choiva e mal tempo. O Goberno local lembrou tamén que nos últimos anos se realizaron actuacións de mellora en áreas infantís como Alfonso IX, O Pasatempo, As Donas, Viuxe, A Ribeira, O Xuncaliño ou a praza do Emigrante.