Os impagos sacoden o final de tempada do Atlético Arteixo
O Atlético Arteixo pechou unha das tempadas máis brillantes da súa historia deportiva cun conflito interno que saíu á luz poucos días despois da eliminación no playoff de ascenso a Segunda RFEF. O plantel, o corpo técnico e traballadores da entidade fixeron pública a súa denuncia por 'continuos retrasos e impagos' nos salarios comprometidos polo club.
Segundo o comunicado dos afectados, a situación arrástrase desde hai meses e non se trata dun episodio puntual. Os integrantes do primeiro equipo aseguran que se lles deben tres mensualidades, mentres que adestradores e traballadores da entidade denuncian dous meses pendentes de pagamento.
Os asinantes tamén critican a 'falta de transparencia e comunicación' por parte da directiva, á que acusan de non explicar con claridade a situación real do club nin de ofrecer solucións concretas. A decisión de facer público o malestar chegou unha vez rematada a competición, xa que, segundo indican, durante a tempada preferiron non prexudicar o rendemento deportivo nin desviar a atención do traballo do equipo.
O malestar chega tras un curso histórico para o conxunto arteixán, que rematou terceiro en Terceira RFEF e chegou á final galega do playoff de ascenso, na que caeu ante a SD Compostela tras a prórroga. Na ida, o Atlético Arteixo gañara 2-1 en Ponte dos Brozos, pero o Compostela remontou na volta e avanzou pola súa mellor clasificación ligueira.
A crise tamén coincide coas primeiras despedidas. O técnico Alejandro Expósito, 'Posi', non continuará no banco tras dúas campañas á fronte do equipo, unha saída anunciada despois da eliminación e presentada como unha separación de mutuo acordo.
Tamén se despediu Jota, unha das pezas destacadas do equipo, que publicou unha mensaxe nas súas redes sociais na que recoñeceu que non era unha decisión que quixese tomar, pero que existen 'circunstancias' que o obrigan a facelo antes do previsto. O xogador agradeceu o apoio da afección, dos compañeiros, dos adestradores, da base e das familias do club, e asegurou que marcha coa tranquilidade de ter dado sempre o mellor como futbolista e como adestrador.
No seu comunicado, os afectados insisten en que o obxectivo non é danar á entidade, senón buscar unha solución que permita garantir o futuro do Atlético Arteixo e manter o club como un espazo de referencia para os nenos e nenas da vila. A situación económica, con todo, abre agora unha etapa de incerteza nun proxecto que viña de vivir o seu mellor momento sobre o céspede.