Os cortes de luz no Polígono Industrial Curtis-Teixeiro provocan perdas e levan aos empresarios a esixir solucións
Os cortes reiterados no subministro eléctrico están a xerar importantes problemas entre as empresas instaladas no Polígono Industrial Curtis-Teixeiro. A situación levou á Asamblea Xeral Ordinaria da agrupación empresarial a acordar unha serie de reclamacións para esixir unha solución á compañía responsable da rede.
Segundo trasladan os empresarios, as interrupcións producíronse de maneira repetida durante os últimos meses e, nalgúns casos, sen aviso previo. As incidencias están a dificultar o funcionamento normal das empresas do parque industrial e provocaron tamén danos materiais e perdas económicas.
Ante esta situación, a agrupación reclama a Unión Fenosa Distribución, do Grupo Naturgy, que realice de maneira inmediata unha revisión técnica exhaustiva do tendido eléctrico para determinar as causas das avarías e adopte as medidas necesarias para corrixilas.
Os empresarios tamén solicitan que se aprobe e execute un plan de mellora da rede que permita recuperar os niveis de calidade e continuidade do subministro establecidos pola normativa e evitar que as interrupcións sigan causando prexuízos ás empresas e aos abonados do municipio.
Ademais, reclaman coñecer o diagnóstico técnico da rede eléctrica e as actuacións que a compañía prevé desenvolver para solucionar definitivamente o problema.
Un problema que afecta a todo o municipio
A problemática non se limita ao polígono industrial. Desde a agrupación sinalan que os cortes están a afectar tamén á actividade cotiá en diferentes parroquias e lugares de Curtis, con interrupcións que chegaron a producirse practicamente a diario.
O Concello de Curtis decidiu sumarse ás reclamacións dos empresarios e asegura que xa presentou unha queixa formal ante Naturgy para reclamar unha solución. A Administración local considera que as incidencias están a ter consecuencias tanto sobre a actividade económica como sobre a vida diaria da veciñanza.
Deste xeito, empresarios e Concello coinciden na necesidade de que se adopten medidas para garantir un subministro eléctrico estable e evitar que os cortes continúen condicionando o día a día do municipio.