Oleiros desprega máis de cen efectivos ante a chegada da eclipse e restrinxe o acceso a varios puntos
Máis dun cento de efectivos da Policía Local, do Servizo Municipal de Emerxencias, Protección Civil e Salvamento e Socorrismo participarán este mércores no dispositivo especial preparado en Oleiros con motivo da eclipse solar. A Garda Civil tamén colaborará no operativo, deseñado para garantir a seguridade ante a previsión de desprazamentos e concentracións de persoas en distintos puntos do municipio.
Restricións de tráfico
O Concello recomenda evitar o uso do vehículo particular sempre que sexa posible e realizar os desprazamentos a pé ou en bicicleta. Ademais, lembra que non será necesario acudir aos lugares con maior concentración de persoas, xa que a eclipse poderá observarse desde calquera punto do municipio.
Durante a xornada haberá restricións de tráfico, pero non de acceso peonil, nos accesos ao Faro de Mera e Seixo Branco, ao Monumento Natural Costa de Dexo-Serantes, así como en Canide, Boi de Canto e As Margaritas. Nestas zonas, o acceso en vehículo estará limitado ás persoas residentes.
Para os desprazamentos por Oleiros, recoméndase utilizar prioritariamente a Vía Ártabra e a N-VI, ademais de respectar en todo momento a sinalización e as indicacións dos efectivos despregados.
Zonas pechadas ao público
Tamén haberá determinados espazos nos que estará prohibida tanto a observación como o acceso do público. É o caso do Castelo de Santa Cruz, de determinadas áreas protexidas do Monumento Natural Costa de Dexo-Serantes, que estarán debidamente sinalizadas, e dos cantís de toda a costa.
As praias si poderán utilizarse como puntos de observación, aínda que contarán cun dispositivo especial de Salvamento e Socorrismo formado por cinco embarcacións. Ademais, desde as 19:30 horas estará prohibido o baño, debido á redución da visibilidade durante o fenómeno e á imposibilidade de utilizar as lentes homologadas mentres se está na auga.
Como observar a eclipse con seguridade
O Concello lembra que a observación debe realizarse exclusivamente con lentes homologadas para a observación solar. Mirar directamente ao Sol sen protección certificada pode provocar lesións irreversibles na vista.
Ante unha emerxencia grave, a cidadanía deberá contactar co 112. Para cuestións relacionadas coa seguridade estarán operativos tamén a Policía Local, no 981 610 001, e a Garda Civil, a través do 062.
O Concello apela finalmente á responsabilidade e colaboración da cidadanía para facilitar o funcionamento do dispositivo e garantir que a xornada poida desenvolverse con seguridade.