O PSOE de Arteixo pide o apoio do pleno aos traballadores de Ferroglobe afectados polo ERTE de 17 meses
O Grupo Municipal Socialista de Arteixo levará ao pleno ordinario desta semana unha moción para solicitar o apoio de toda a corporación aos 113 traballadores da planta de Ferroglobe en Sabón e aos máis de 200 empregos indirectos afectados polo Expediente de Regulación Temporal de Emprego (ERTE) anunciado pola compañía.
A iniciativa chega en plena crise da factoría, despois de que a empresa expuxese un ERTE que se prolongaría entre o 1 de agosto de 2026 e o 31 de decembro de 2027. O expediente, rexeitado polo comité de empresa, provocou xa mobilizacións da plantilla e unha folga para reclamar alternativas que garantan a continuidade da actividade.
Na moción, os socialistas consideran que un período de regulación de 17 meses supón unha ameaza para a continuidade da planta e para o emprego industrial en Arteixo. Por iso, propoñen que o Concello amose o seu respaldo aos traballadores e inste á dirección de Ferroglobe a negociar un plan de viabilidade que ofreza garantías de futuro para as instalacións de Sabón.
O portavoz socialista, Martín Seco, sostén que a situación responde a unha combinación de factores. Por unha banda, apunta á competencia do silicio procedente de China, que, ao seu xuízo, entra no mercado europeo en condicións de competencia desleal. Por outra, considera que a empresa tamén ten responsabilidade por non pechar con suficiente antelación acordos de compravenda de enerxía a longo prazo (PPA) que permitisen reducir o impacto dos custos eléctricos nunha industria electrointensiva.
A moción tamén solicita que a Xunta de Galicia e o Goberno de España fagan unha fronte común ante as institucións europeas para reclamar mecanismos comerciais que protexan a industria comunitaria fronte ás importacións asiáticas.
Para o PSOE, a planta de Sabón representa unha infraestrutura estratéxica para o tecido industrial galego e a súa continuidade resulta fundamental tanto polos empregos directos como polos indirectos que dependen da súa actividade.