Política | Concello

O pleno aproba por unanimidade adaptar o convenio con Augas de Galicia, que permitirá executar unha actuación destinada a reducir o risco de inundacións

O pleno ordinario de xuño do Concello de Sada deu luz verde por unanimidade á modificación das bases de execución do orzamento de 2026 para adaptar o calendario de pagos do proxecto de renaturalización do río Maior ao convenio definitivo asinado con Augas de Galicia.

A medida permitirá axustar os compromisos económicos do Concello á planificación definitiva da actuación, unha das intervencións máis importantes previstas no municipio para reducir o risco de inundacións na contorna urbana. O cambio supón que a administración local non terá que realizar desembolsos este ano, xa que o primeiro pagamento queda aprazado a 2027 e o financiamento estenderase ata 2030.

Segundo o novo calendario económico, o Concello achegará algo máis de 3,5 millóns de euros, correspondentes ao 50% do custo da actuación. A primeira anualidade será de 516.484 euros en 2027, mentres que en 2028 se realizará o maior desembolso, con 1,5 millóns de euros. En 2029 aboarase outro millón e os arredor de 500.000 euros restantes completaranse en 2030.

O proxecto de renaturalización do río Maior prevé recuperar o seu leito ao paso polo centro urbano, eliminando parte dos tramos soterrados e mellorando a capacidade hidráulica do cauce. A actuación inclúe tamén medidas de restauración ambiental e a recuperación do humidal das Brañas, co obxectivo de diminuír o impacto das enchentes que afectan periodicamente á zona.

Antes de iniciar os traballos será necesario completar diversos trámites administrativos, entre eles a cesión ao Concello de dúas estradas provinciais afectadas pola intervención, un paso imprescindible para executar as obras previstas.

A sesión plenaria comezou cun minuto de silencio en memoria das vítimas dos terremotos rexistrados en Venezuela. Ademais da modificación orzamentaria, a Corporación aprobou por unanimidade unha moción do BNG relativa ao abastecemento de auga, mentres que rexeitou a proposta presentada por Unidos por Sada para modificar o Regulamento Orgánico Municipal.