O pleno extraordinario de Carral decidirá o luns sobre as alegacións ás novas taxas das instalacións deportivas
O Concello de Carral celebrará o vindeiro luns 13 de xullo, ás 10.00 horas, un pleno extraordinario no que resolverá as alegacións presentadas á modificación da Ordenanza Fiscal número 22, que regula as taxas pola utilización das instalacións deportivas e culturais municipais. A sesión servirá ademais para aprobar definitivamente esta modificación, que inclúe a actualización das tarifas aplicables, entre elas as correspondentes ás entradas da piscina municipal durante a tempada de verán.
O debate chega despois de varios meses de controversia arredor da modificación da ordenanza. A aprobación inicial saíu adiante no pleno celebrado en maio cos votos favorables do goberno local e dos concelleiros non adscritos, mentres que PSOE e Alternativa dos Veciños manifestaron o seu rexeitamento ao considerar excesivo o incremento das tarifas. A cuestión adquiriu especial repercusión coa apertura da piscina municipal para a campaña estival, cando as novas contías comezaron a aplicarse aos usuarios.
Precisamente os socialistas anunciaron que presentaron unha alegación coa intención de evitar que o incremento das taxas repercuta na veciñanza de Carral. Con todo, a súa voceira non poderá asistir á sesión extraordinaria por motivos laborais ao celebrarse ás 10.00 horas, polo que o grupo xa avanzou que trasladará o debate a través dunha moción no vindeiro pleno ordinario.
O PSOE tamén cuestionou o horario escollido para a convocatoria. Os socialistas lembran que cando o Partido Popular estaba na oposición defendía que os plenos e reunións municipais se celebrasen en horario de tarde para facilitar a participación dos concelleiros e consideran contraditorio que agora convoque esta sesión en horario de mañá. En todo caso, destacan que os plenos ordinarios continuarán celebrándose pola tarde ao existir un acordo plenario que así o establece.
Ademais da resolución das alegacións, a Corporación deberá aprobar a corrección dun erro material na tramitación da segunda fase do Plan de Obras e Servizos da Deputación da Coruña, un trámite necesario para continuar coa execución dos proxectos incluídos neste programa provincial.
A orde do día completarase coa aprobación das festas locais de Carral para o ano 2027, un acordo que permitirá trasladar con antelación o calendario laboral do próximo exercicio.