O pan volve encher o Campo da Feira de Carral nunha festa con sabor a tradición
A XXII Festa do Pan de Carral chegou este domingo ao seu remate despois dunha fin de semana na que o Campo da Feira volveu converterse nun punto de encontro arredor dun dos produtos máis identificativos do municipio. A cita mantivo durante as dúas xornadas unha alta afluencia de público, especialmente nos postos de venda do pan e do bocadillo cardiosaudable, elaborado con pan de Carral, aceite, tomate e xamón, e nos obradoiros infantís de elaboración de bolos.
A segunda e última xornada arrincou ás 11.00 horas coa reapertura da feira medieval, dos expositores das asociacións municipais e dos centros educativos, así como dos espazos de venda e degustación. As familias volveron ser protagonistas nos talleres de pan e pulseiras de coiro, mentres o expositor 'Pan en 3D' permitiu achegarse de forma virtual ao traballo dun obradoiro.
Un dos momentos máis concorridos da tarde foi o espectáculo 'Rufina e Benito', no que se repartiron anacos de pan de Carral entre o público asistente. A proposta puxo o acento no carácter popular da celebración, que combina gastronomía, memoria e animación de rúa. A programación completouse con actuacións de Gaeloc Medieval, a charanga Sorcha Show Band e a sesión nocturna da Orquestra Acordes.
A parte máis tradicional da festa chegou ao mediodía coa misa solemne en honra a San Honorato, patrón dos panadeiros, seguida da procesión coa participación da Coral Polifónica Aires de Carral e do Grupo de Música Tradicional Arnela. A música xa marcara tamén a primeira xornada, con propostas como a charanga Noroeste, o Dúo D’Vicio, América de Vigo, os espectáculos de zancudos e malabaristas e a representación teatral 'O toxo', a cargo do alumnado do IES de Carral.
Na visita institucional deste domingo, o presidente da Deputación da Coruña, Valentín González Formoso, acompañado polo alcalde, José Luis Fernández Mouriño, puxo en valor a calidade do pan de Carral e o traballo artesanal das familias panadeiras. Formoso salientou que este produto é xa 'un símbolo recoñecido en toda Galicia' e defendeu a importancia de apoiar celebracións que axudan a dinamizar o comercio local, atraer visitantes e difundir os produtos de calidade.
O alcalde agradeceu a colaboración provincial e subliñou o papel dos panadeiros e panadeiras na conservación dunha tradición que forma parte da historia local. A festa, organizada coa participación da Asociación de Panadeiros de Carral, chega xa á súa vixésimo segunda edición e consolídase como unha das citas gastronómicas destacadas da comarca.
O pan de Carral é recoñecido pola súa miga esponxosa, a súa codia crocante e o seu sabor característico a trigo. A súa elaboración artesanal mantén unha tradición vinculada historicamente á calidade dos cereais do Val de Barcia, ao amasado manual, aos fermentos de hornadas anteriores e aos fornos de leña, elementos que contribuíron a facer deste produto unha referencia dentro e fóra de Galicia.