O Concello de Curtis denuncia novos actos vandálicos na zona educativa do municipio
O Concello de Curtis denunciou este mércores ante a Garda Civil novos actos vandálicos contra bens públicos na zona educativa do municipio. Os danos afectan ao CEIP de Curtis e ao Centro de Ocio Infantil, dous espazos cuxo mantemento corresponde á Administración municipal.
Segundo as primeiras estimacións realizadas polos técnicos municipais, os desperfectos provocados nesta ocasión poderían supoñer un custo superior aos 1.000 euros para as arcas públicas. Entre os danos detectados figuran a rotura de cristais e a aparición de pintadas nos inmobles.
O vandalismo supón 30.000 euros ao ano
O Concello sinala que este tipo de actuacións non constitúe un feito illado no municipio. Segundo os datos facilitados polo Goberno local, a reparación dos danos ocasionados por actos vandálicos supón cada ano un desembolso aproximado de 30.000 euros, que debe ser asumido con fondos públicos.
O alcalde de Curtis, Javier Caínzos, lamentou os feitos e asegurou que o Concello permanecerá atento para protexer os bens municipais.
'Estamos falando de bens e inmobles que pertencen a todos os cidadáns', sinalou o rexedor, que tamén fixo un chamamento á responsabilidade e ao respecto pola vía pública e polos equipamentos municipais.
Un novo ataque tras as pintadas detectadas hai menos dun mes
Este episodio prodúcese menos dun mes despois doutra denuncia presentada polo Concello de Curtis por pintadas aparecidas en diferentes puntos do termo municipal. Naquel caso, os grafitis afectaron a espazos como o Recinto Feiral de Curtis e o paso inferior da vía en Teixeiro.
Desde o Concello lembran que os custos derivados da reparación destes danos repercuten no conxunto da veciñanza, ao tratarse de patrimonio e equipamentos públicos.