O BNG de Irixoa pide manter este verán o autobús gratuíto a Betanzos
O BNG de Irixoa reclama ao goberno municipal que manteña durante os meses de verán o servizo de autobús gratuíto entre Irixoa e Betanzos, que quedou pausado esta semana. A formación considera que esta conexión segue sendo necesaria para unha parte da veciñanza, especialmente para as persoas maiores ou para quen non dispón de vehículo privado.
Os nacionalistas lembran que Betanzos funciona como cabeceira comarcal e concentra servizos aos que moitos veciños de Irixoa precisan acudir de maneira habitual. Entre eles, trámites administrativos, xestións bancarias, compras ou outros servizos que non están dispoñibles no municipio.
O portavoz municipal do BNG, Sergio Boado, advertiu de que a suspensión do autobús durante o verán deixa sen unha alternativa de transporte a persoas que necesitan desprazarse con regularidade. Por iso, defende que o Concello debe garantir unha conexión razoable con Betanzos tamén nos meses estivais.
Desde o BNG inciden en que a mobilidade é un dos principais retos do rural galego. A falta de transporte público, sinalan, contribúe ao illamento dunha parte da poboación e dificulta o acceso a servizos básicos, especialmente nos concellos con núcleos dispersos.
A formación solicita que se reconsideren os cambios no servizo e que se manteñan, como mínimo, as conexións periódicas que existían ata o momento. Ademais, propón ampliar as frecuencias nos días de feira e mercado en Betanzos, unha medida que, ao seu xuízo, facilitaría os desprazamentos da veciñanza e tamén favorecería o comercio de proximidade e o consumo de produtos locais.