O barro volve conquistar Santa Cruz tras cinco días de artesanía, cultura e miles de visitantes
Cinco días de actividade e un Parque Luís Seoane ateigado de visitantes volveron situar a olería no centro da vida cultural de Santa Cruz. A XXXII edición de Alfaroleiros rematou tras reunir milleiros de persoas e 23 oleiros e oleiras procedentes de diferentes puntos de España e Portugal.
A feira deixou tamén un importante volume de vendas, cunha elevada demanda das pezas expostas nos diferentes postos. Desde obxectos de uso cotián ata creacións decorativas e pezas de autor, o barro volveu ser o protagonista dunha cita que mantén unha aposta clara pola artesanía e pola continuidade dun oficio tradicional.
A edición deste ano combinou a actividade comercial coa programación cultural. Durante os cinco días sucedéronse concertos, espectáculos, demostracións de olería e obradoiros, ademais doutras propostas destinadas a públicos de diferentes idades.
A presenza de artesáns procedentes tanto de España como de Portugal permitiu ademais reunir en Santa Cruz diferentes formas de entender o traballo do barro, nun encontro no que a tradición convive con propostas máis contemporáneas.
O impacto da feira foi máis alá do propio recinto. A chegada de visitantes doutras localidades galegas e doutras comunidades contribuíu a dinamizar durante estes días o comercio, a hostalaría e a restauración de Oleiros, ao tempo que moitos dos asistentes aproveitaron a súa visita para coñecer outros atractivos do municipio.
Trinta e dous anos despois do seu nacemento, Alfaroleiros mantén así unha das súas principais características: converter a artesanía nunha experiencia aberta ao público e reivindicar a olería como parte do patrimonio cultural.
O Concello de Oleiros leva máis de tres décadas apoiando esta celebración, que se consolidou como unha das citas relacionadas coa artesanía máis destacadas do verán galego. A continuidade do evento permitiu ademais que o traballo dos oleiros manteña unha presenza estable ante o público e favoreceu a transmisión dun oficio que afronta o reto de sobrevivir nun mercado cada vez máis industrializado.
A XXXII edición baixa así o pano cun balance positivo para organizadores e artesáns e coa mirada posta xa nunha nova edición dunha festa que converte cada verán o barro nun dos protagonistas de Santa Cruz.