O 83 % das familias de Miño escolarizaría os seus fillos nun instituto no municipio
O 83,1 % das familias participantes nunha enquisa sobre a situación educativa de Miño escolarizaría os seus fillos e fillas nun instituto no municipio se existise. Ademais, case a metade considera que a construción deste centro debería ser a principal inversión educativa da localidade nos próximos cinco anos.
Son algunhas das principais conclusións da consulta difundida polo Concello de Miño e a ANPA Castro Baxoi, na que participaron 184 familias con menores de entre 3 e 18 anos. O obxectivo é coñecer as necesidades da comunidade educativa e recoller propostas para mellorar a oferta formativa, as instalacións e os servizos escolares.
A falta de determinadas etapas educativas é unha das preocupacións máis repetidas. O 89 % das persoas participantes sinala a ausencia de Bacharelato e dous terzos consideran necesaria a implantación de Formación Profesional (FP). Ademais, unha parte importante das familias reclama un instituto de Educación Secundaria Obrigatoria (ESO) independente.
A enquisa tamén reflicte a percepción de que a oferta actual non responde a todas as necesidades. De feito, máis de oito de cada dez persoas consultadas consideran que os estudos dispoñibles no municipio son insuficientes.
Sanidade e informática, entre as opcións de FP máis demandadas
A consulta tamén preguntou polas especialidades de Formación Profesional que poderían interesar ás familias. Sanidade e Informática encabezan as preferencias, seguidas de Electricidade, Administración, Deporte e Servizos Socioculturais.
A maioría das persoas participantes tamén valoraría que os seus fillos e fillas puidesen cursar FP en Miño se se incorporase esta opción á oferta educativa local.
Á hora de decidir cal debería ser a principal inversión educativa dos próximos cinco anos, a construción dun instituto sitúase en primeiro lugar. A continuación aparecen a mellora das instalacións do CPI Castro Baxoi e a implantación de novos ciclos de Formación Profesional.
A cuberta e o horario da ESO, entre as principais melloras no CPI Castro Baxoi
As instalacións do CPI Castro Baxoi concentran boa parte das demandas das familias. A reparación da cuberta é a actuación máis sinalada, seguida da revisión dos horarios da ESO e da solución aos problemas de humidades.
Tamén se reclaman melloras no patio, na fachada, na seguridade e nos materiais e espazos do centro. Entre as propostas figuran, ademais, reforzar os recursos de persoal, mellorar a limpeza e o mantemento e prestar especial atención á seguridade nos baños.
As familias tamén propoñen recuperar actividades extraescolares a prezos asumibles, mellorar a comunicación coa comunidade educativa e revisar a organización dos horarios do profesorado.
O transporte escolar, outra preocupación das familias
O transporte escolar é outro dos asuntos que aparecen na enquisa. Sete de cada dez persoas participantes consideran que este servizo condiciona negativamente a organización dos horarios do alumnado.
As respostas tamén amosan divisións á hora de valorar se o transporte actual é adecuado. Entre as demandas recollidas figuran mellorar e ampliar as conexións con localidades próximas, como Betanzos e Pontedeume, e adaptar os horarios para facilitar os desprazamentos diarios dos estudantes.
As entidades esperan unha maior participación das familias
O Concello e a ANPA Castro Baxoi agradeceron a participación das 184 persoas que responderon á consulta, aínda que lamentaron que a implicación fose menor da agardada tendo en conta que Miño conta con máis de 900 menores en idade escolar empadroados.
As entidades consideran que a participación das familias é fundamental para identificar as necesidades reais da comunidade educativa e formular propostas máis representativas. Por iso, agardan contar cunha maior implicación nas próximas iniciativas que se están preparando.
Os resultados sitúan a construción dun instituto, a ampliación da oferta educativa e a mellora das instalacións do CPI Castro Baxoi entre as principais demandas das familias para o futuro da educación en Miño.