Máis de 200 familias de Arteixo reciben axudas de comedor mentres se abren novas bolsas escolares
Un total de 234 familias de Arteixo beneficiaranse este curso das axudas municipais destinadas a sufragar parte do custo do servizo de comedor escolar. O Concello publicou este xoves as listaxes de persoas beneficiarias e mantén unha partida anual de 200.000 euros para apoiar economicamente ás familias dos alumnos dos centros educativos do municipio.
Unha das medidas adoptadas para facilitar o acceso a estas axudas é que as familias non teñen que adiantar o importe correspondente á subvención. O Concello encárgase directamente de aboar a cantidade concedida ás entidades ou profesionais que prestan o servizo de comedor.
A concesión das axudas está condicionada ao mantemento da escolarización e á asistencia ao servizo durante o curso, ademais do cumprimento das restantes obrigas establecidas nas bases reguladoras. No caso de que un alumno deixe de utilizar o comedor, a baixa deberá comunicarse inmediatamente ao Departamento de Educación do Concello de Arteixo.
Apoio tamén ás ANPAS
O Concello conta ademais cunha liña específica de subvencións destinada ás ANPAS, coa finalidade de colaborar cos gastos derivados da xestión dos comedores escolares.
Esta medida busca contribuír a reducir o custo do servizo para as familias que utilizan os comedores. Entre as tarefas que poden ser obxecto desta colaboración figuran o acompañamento e coidado dos menores, o apoio durante as comidas, a dinamización dos grupos, os labores de hixiene antes e despois do servizo e o mantemento da orde e da seguridade durante o período de responsabilidade das persoas encargadas.
As axudas tamén poden cubrir outras tarefas relacionadas directamente coa prestación do servizo de comedor nos centros educativos.
Aberto o prazo para material e transporte
Ao mesmo tempo, o Concello de Arteixo abriu o prazo para solicitar outras dúas liñas de apoio económico destinadas ás familias con estudantes. Por unha banda, están as axudas para a compra de libros e material didáctico e, por outra, as destinadas a sufragar parte do custo do transporte escolar e a mobilidade dos alumnos.
As solicitudes poden presentarse a través da sede electrónica do Concello de Arteixo ou presencialmente no Departamento de Educación, en horario de 9.00 a 14.00 horas. Tamén existe a posibilidade de realizar os trámites a través doutros rexistros municipais, de acordo co sistema establecido en cada caso.