Curtis distingue o compromiso coa igualdade de Ana Rodríguez Piorno e José Ángel Vázquez Yáñez
O Concello de Curtis fixo públicas as distincións dos premios 'Sementes de Igualdade' 2026, un recoñecemento que nace este ano con identidade propia dentro das honras municipais para poñer o foco, de maneira exclusiva, en iniciativas e traxectorias vinculadas á igualdade de oportunidades e á erradicación da violencia de xénero.
A decisión foi adoptada por unanimidade pola Comisión Técnica de Valoración, presidida pola concelleira de Igualdade e integrada por persoal técnico das áreas de Benestar, Igualdade e Deportes. O órgano destacou o valor social e humano das candidaturas escollidas, así como o seu impacto na construción dunha sociedade máis xusta e igualitaria.
Nesta primeira edición oficial do distintivo, o Concello recoñece a José Ángel Vázquez Yáñez, director do Centro Penitenciario de Teixeiro, pola súa implicación en políticas de igualdade. O xurado puxo en valor, especialmente, o impulso do programa 'Ser Muller', unha iniciativa desenvolvida de maneira continuada no centro coa colaboración do Concello de Curtis e orientada ao empoderamento e á transformación social.
O segundo premio recae en Ana Rodríguez Piorno, xuíza do Xulgado de Primeira Instancia de Betanzos con competencia en violencia sobre a muller. A comisión subliña a súa traxectoria profesional e, en particular, unha práctica xudicial marcada pola sensibilidade cara ás vítimas, reducindo na medida do posible o impacto emocional e as consecuencias traumáticas que sofren as mulleres e tamén os seus fillos e fillas durante o proceso.
A proposta foi dada a coñecer na última Comisión de Coordinación do Goberno local e consolida a aposta do municipio por visibilizar o traballo de persoas que, desde ámbitos moi distintos, contribúen cada día a avanzar en igualdade.
A entrega dos premios celebrarase o sábado 25 de abril no Edificio de Usos Múltiples de Teixeiro. O acto, aberto a toda a veciñanza, comezará ás 12.00 horas e servirá para formalizar un galardón que nace con vocación de continuidade dentro do calendario institucional de Curtis.