Betanzos abrirá o luns o prazo de inscrición para o campamento de Nadal, que se celebrará do 22 de decembro ao 7 de xaneiro

O Concello de Betanzos abrirá o próximo luns, 23 de novembro, o prazo de inscrición para participar no campamento de Nadal Betanzos Concilia 2026/2027, unha iniciativa municipal destinada a facilitar a conciliación da vida familiar, laboral e persoal durante as vacacións escolares. As solicitudes poderán presentarse ata o venres 4 de decembro, ambos os dous días incluídos.
A alcaldesa, María Barral Varela, presentou o programa, que se desenvolverá entre o 22 de decembro e o 7 de xaneiro no Aulario de Infantil do CEIP Francisco Vales Villamarín. O campamento estará dirixido a menores de entre 3 e 12 anos, nacidos entre 2014 e 2023, e contará cun total de 10 días de actividade, de luns a venres, agás festivos.
O horario de entrada será flexible, entre as 8.00 e as 9.00 horas, mentres que a recollida poderá realizarse entre as 14.00 e as 15.00 horas. Ademais, de 8.00 a 9.00 horas funcionará o servizo de Mañanceiros, sen custo adicional e sen almorzo incluído, polo que os participantes poderán levar o almorzo da casa.
Xogos, obradoiros e actividades arredor da igualdade
A programación terá como eixo central a igualdade entre nenas e nenos e combinará xogos, obradoiros e actividades propias da época do Nadal. Tamén incluirá unha saída fóra do municipio.
O obxectivo, segundo explicou María Barral, é que os menores poidan desenvolver a súa creatividade a través do xogo, aprender a comunicarse e tomar decisións, traballar en equipo e adquirir hábitos relacionados coas actividades ao aire libre e o exercicio físico.
O Concello ofertará un total de 20 prazas, que se cubrirán por estrita orde de inscrición. Para que o campamento poida celebrarse será necesario alcanzar un mínimo de 12 participantes. As familias empadroadas en Betanzos terán preferencia, mentres que as que non o estean poderán acceder unicamente se quedan prazas dispoñibles.
O prezo do servizo será de 50 euros por neno ou nena, unha cantidade subvencionada polo Concello. As familias numerosas que acrediten esta condición no momento de presentar a solicitude poderán beneficiarse dun desconto do 20 % por cada fillo ou filla.
Inscrición e calendario
As solicitudes deberán presentarse preferentemente a través da sede electrónica municipal, no apartado de Servizos Sociais e dentro do trámite 'Campamentos Nadal Concilia 2026/2027'. As persoas que non dispoñan de medios electrónicos poderán realizar a xestión excepcionalmente nos Servizos Sociais municipais, previa chamada ao 981 77 07 07.
O calendario previsto establece a publicación da listaxe provisional de admitidos o luns 7 de decembro, cun prazo de tres días naturais para presentar reclamacións ou renuncias. A listaxe definitiva darase a coñecer o venres 11 de decembro.
As familias deberán realizar o pagamento da cota e enviar o xustificante antes do xoves 17 de decembro a través da Oficina Virtual Tributaria. A reunión informativa coas familias e coa empresa responsable do campamento terá lugar o venres 18 de decembro, ás 19.00 horas, no Salón Azul do Edificio Liceo.
As listaxes de participantes poderán consultarse na sede electrónica municipal e nos taboleiros de anuncios dos Servizos Sociais e do Edificio Liceo.