Educación | Sociedade

As ANPA e familias denuncian que seguen sen recibir información suficiente sobre os novos proxectos educativos e a transición ás empresas que asumirán seis centros

As familias das escolas infantís municipais da Coruña afrontan o inicio do novo curso con preocupación ante o cambio de xestión previsto para o 1 de outubro en seis dos oito centros da rede. A poucos días do comezo das clases, varias ANPA e familias volveron reclamar información ao Concello e aseguran que continúan existindo incógnitas sobre como se producirá a transición.

O posicionamento está asinado pola ANPA das Moas (Carricanta), ANPA Titongo, ANPA Caracola, ANPA Arela e familias das EIM Luís Seoane, Os Rosales, Agra do Orzán e Os Cativos.

Nun comunicado, as familias sinalan que o curso comezará este venres coas empresas que xestionaban ata agora as escolas, pero que está previsto que o 1 de outubro se produza o relevo polas novas adxudicatarias.

A principal preocupación céntrase agora na información sobre o que sucederá cando se produza ese cambio. As familias aseguran que seguen sen coñecer con suficiente detalle cuestións como os proxectos educativos, a organización dos centros, os materiais ou a comunicación coas familias.

As ANPA consideran especialmente delicado que o relevo se produza co curso xa iniciado, nun servizo destinado a nenos e nenas de 0 a 3 anos.

Seis escolas cambiarán de xestión

O proceso afecta ás escolas de Carricanta, Arela, Os Cativos, Os Rosales, Luís Seoane e Agra do Orzán. A adxudicación do servizo culminouse en agosto, despois dun proceso que xerou preocupación entre familias e traballadoras pola continuidade dos proxectos educativos e dos equipos profesionais.

As familias xa viñan reclamando información sobre o futuro dos centros e sobre os proxectos que desenvolverán as novas empresas. A cuestión da continuidade educativa e da organización das escolas xa fora exposta polas familias nas semanas previas ao inicio do curso.

O Concello defendeu a continuidade do persoal

Durante a tramitación do novo contrato, un dos asuntos que máis preocupación xerou foi o futuro das profesionais que traballan actualmente nas escolas. O Concello defendeu que o persoal terá dereito á subrogación, polo que o cambio de empresa non debería supoñer a saída das educadoras e demais traballadoras dos centros.

O novo modelo de xestión tamén provocou críticas por parte das traballadoras, que cuestionaron os pregos de contratación e reclamaron melloras laborais e educativas.

Agora, co inicio das clases ás portas, as familias volven poñer o foco na transición prevista para outubro. Reclaman que o Concello facilite información clara e con antelación sobre como serán os novos proxectos educativos e a organización dos centros a partir do 1 de outubro.

Deste xeito, o curso comezará cunha situación pouco habitual: o alumnado iniciará as clases coas empresas que xestionan actualmente os centros e, poucas semanas despois, produciráse o relevo nas seis escolas incluídas no novo contrato.