Aberto o prazo para optar ao VII Premio de Poesía Filomena Dato en Bergondo
O Concello de Bergondo abriu o prazo de presentación de obras para a sétima edición do Premio de Poesía Filomena Dato, unha convocatoria que continúa a medrar como referente da creación literaria en galego.
As persoas interesadas poderán entregar os seus orixinais ata o 31 de xullo de 2026 na Casa da Cultura do Concello. O galardón está dirixido a libros de poesía inéditos, escritos en lingua galega e cunha extensión mínima de 500 versos.
O premio conta cunha dotación económica de 2.500 euros. Ademais, o poemario vencedor será publicado pola editorial Apiario dentro da colección de poesía ‘Filomena Dato’, reforzando así a difusión das novas voces da lírica galega.
O fallo do xurado e a entrega do galardón celebraranse antes do 31 de outubro, nun acto no que estará presente o autor ou autora da obra premiada.
Desde o goberno local salientan a consolidación dun certame que, na súa sétima edición, busca seguir impulsando a creación poética en galego e manter vivo o legado de Filomena Dato. Tamén destacan o elevado nivel das obras presentadas en convocatorias anteriores e a implicación das persoas participantes.
A edición de 2026 coincide ademais co Ano Filomena Dato, co que Bergondo quere contribuír a divulgar a figura desta escritora e feminista galega, nacida en 1856 e falecida en 1926. Dato Muruais foi unha das voces vinculadas ao Rexurdimento, aínda que a súa traxectoria segue a ser menos coñecida do que merece dentro da historia da literatura galega.