A veciñanza de Bergondo poderá decidir en que investir 100.000 euros dos Orzamentos Participativos de 2027
A veciñanza de Bergondo xa pode presentar as súas propostas para decidir en que investir 100.000 euros dos Orzamentos Participativos de 2027. O Concello puxo en marcha a novena edición deste programa, que busca implicar directamente aos residentes na elección dunha actuación para mellorar o municipio.
As persoas interesadas terán ata o 23 de outubro para presentar as súas ideas. Entre todas as iniciativas recibidas seleccionaranse aquelas que cumpran os requisitos establecidos e sexan viables técnica e economicamente. Finalmente, unha das propostas será escollida para recibir a partida máxima de 100.000 euros.
Para participar é necesario estar empadroado ou residir en Bergondo. Ademais, as iniciativas deben poder ser executadas directamente polo Concello, sen depender doutras administracións, e ter un interese xeral para o municipio ou para algunha das súas parroquias.
As propostas poderán presentarse no Rexistro municipal, a través da sede electrónica, nos buzóns dos centros sociais das parroquias ou mediante o correo electrónico correo@bergondo.gal.
Unha vez rematado o prazo, o Concello recompilará todas as iniciativas e comprobará cales se axustan ás condicións da convocatoria e ao límite económico establecido. O resultado darase a coñecer o 30 de outubro a través da web municipal e das redes sociais.
As ideas que non encaixen neste proceso, pero que poidan resultar de interese, poderán ser estudadas para incorporalas a outros programas de investimento ou para solicitar financiamento mediante subvencións doutras administracións.
Premios para as mellores propostas
A convocatoria tamén inclúe premios para recoñecer as iniciativas máis valoradas. A proposta gañadora recibirá un bono de 100 euros para gastar no comercio local, mentres que as seis seguintes obterán bonos de 50 euros cada unha.
Deste xeito, o programa busca facilitar a participación directa da cidadanía na definición de parte das prioridades de investimento municipal para o próximo ano.