A Coruña decide o destino de máis de 2,5 millóns de euros nos novos Orzamentos Participativos
Máis de 2,5 millóns de euros de investimento municipal xa teñen destino na Coruña. A cidadanía seleccionou 32 actuacións dentro dos Orzamentos Participativos 2026, nun proceso no que as propostas procedentes dos barrios marcarán parte das actuacións que se desenvolverán nos próximos dous anos.
Nesta edición presentáronse 436 propostas de investimento, doce máis que na convocatoria anterior, o que supón un incremento próximo ao 3%. Tras pasar polos informes técnicos, xurídicos e económicos dos diferentes servizos municipais, 102 iniciativas foron consideradas viables e quedaron finalmente á disposición da veciñanza para a súa elección.
O resultado das votacións traduciuse na selección de 32 actuacións, cun investimento conxunto de 2.513.230 euros. As iniciativas abranguen os dez distritos da cidade, mentres que seis dos proxectos teñen carácter de ámbito cidade, segundo explicou o Concello.
O Goberno municipal destaca ademais o carácter territorial do proceso, xa que as propostas seleccionadas proceden de diferentes zonas da Coruña e responden ás necesidades detectadas directamente pola veciñanza nos seus barrios. A intención é que estas actuacións se materialicen ao longo dos exercicios 2027 e 2028.
A alcaldesa, Inés Rey, presentou as iniciativas acompañada polo concelleiro de Economía e Planificación Estratéxica, José Manuel Lage, e pola concelleira de Benestar Social, Participación e Igualdade, Nereida Canosa. Durante a presentación, Rey puxo o foco no incremento do número de propostas recibidas e na implicación cidadá durante o proceso.
A nova convocatoria consolida así os Orzamentos Participativos como unha vía para que a veciñanza propoña e escolla directamente parte dos investimentos municipais, trasladando ás contas públicas actuacións que parten das demandas formuladas desde os propios barrios.