A Consellería defende o novo ciclo de FP en Carral e pide reconducir a situación
A Xunta mantén a súa aposta pola implantación da Formación Profesional Básica de Mantemento de Vehículos no IES de Carral e non acepta a dimisión en bloque presentada polo equipo directivo do centro. A Consellería de Educación defende que o novo ciclo pode ser positivo para o alumnado, as familias e o propio instituto, e asegura que continúa mantendo contactos coa dirección para tratar de 'reconducir a situación'.
O conflito xurdiu tras a publicación no Diario Oficial de Galicia da oferta de 18 prazas para este novo ciclo, unha decisión que provocou malestar entre parte da comunidade educativa. O equipo directivo presentou a súa renuncia ao considerar que a implantación se realizou sen resolver previamente as dúbidas sobre espazos, medios materiais e recursos humanos.
Educación, pola súa banda, insiste en que a proposta formativa é axeitada e chama ao diálogo para acadar un consenso. A Xunta tamén se opuxo á xornada de folga prevista no centro ao entender que non cumpría o prazo mínimo legal de convocatoria.
As familias e o profesorado critican especialmente a falta de negociación e a previsión de instalar unha aula móbil nunha parcela próxima ao instituto para poder impartir parte das clases. Ademais, advirten de que o alumnado da FP compartirá materias coa ESO e cuestionan que o centro dispoña de capacidade suficiente para asumir o novo ciclo.
O malestar chegou tamén ao ámbito político, con iniciativas no pleno municipal de Carral e no Parlamento galego. Mentres tanto, a comunidade educativa mantén convocadas novas mobilizacións no Campo da Feira para reclamar explicacións e pedir que a implantación da FP se faga con garantías.