A aprobación do PXOM reabre a disputa política polo futuro urbanístico de Betanzos
O debate sobre o futuro urbanístico de Betanzos sobe de ton ás portas do pleno extraordinario no que se abordará a aprobación provisional do Plan Xeral de Ordenación Municipal. O BNG cargou contra o acordo que permitirá ao goberno local do PSOE sacar adiante o documento co respaldo do PP e sostén que esa coincidencia evidencia unha 'pinza urbanística' entre populares e socialistas.
A formación nacionalista considera que o voto favorable anunciado polo PP confirma que ambas forzas comparten, no esencial, o mesmo modelo de cidade. O principal punto de fricción segue situado no Carregal, unha zona que o BNG cualifica como inundábel e que, ao seu xuízo, debería quedar reservada como espazo verde en lugar de manter aberta a posibilidade de novas edificacións.
A portavoz nacionalista, Amelia Sánchez, advertiu de que o documento non limita o problema a unha parcela concreta, senón que deixa aberta a opción de construír no conxunto do ámbito do Carregal. Para o BNG, permitir desenvolvementos residenciais nesa contorna supón asumir riscos urbanísticos nun momento no que, defenden, xa existe plena conciencia das consecuencias de edificar en zonas vulnerábeis.
Sánchez tamén puxo o foco na posición do PP, ao que acusa de manter un discurso duro contra o goberno local en asuntos menores mentres acaba coincidindo co PSOE cando se tratan decisións estruturais. Segundo o Bloque, os populares levan anos instalados na confrontación política, pero non presentan unha alternativa propia para cuestións decisivas como o urbanismo, o modelo de cidade ou o futuro económico do municipio.
O BNG insiste en que Betanzos precisa un PXOM, pero non a calquera prezo. A formación lembra que participou no proceso de negociación e reivindica que as súas achegas permitiron introducir cambios no documento, como a eliminación dos SUNC de Infesta e a redución da construción prevista no Frade e na Cañota. Con todo, considera que esas melloras non son suficientes mentres o plan siga permitindo edificar no Carregal.
As nacionalistas aseguran que trasladaron ao PSOE a súa disposición a seguir traballando para chegar a un documento con maiores garantías, pero entenden que o goberno local optou por buscar o apoio do PP para sacar adiante o plan. 'Este tema deixa claro que hai dous modelos para escoller: o do PP-PSOE e o do BNG', concluíu Amelia Sánchez.
O pleno de aprobación provisional do PXOM celebrarase este luns 18 de maio, ás 20.30 horas. Desde o BNG chaman á veciñanza a asistir á sesión ou a seguila de maneira virtual pola importancia que, ao seu xuízo, terá esta decisión para o futuro de Betanzos.