Vilasantar incorporará unha segunda casa niño con cinco novas prazas gratuítas para menores de tres anos
Vilasantar contará cunha segunda casa niño para atender nenos e nenas de entre 0 e 3 anos. O novo recurso, que levará o nome de 'A Casiña dos Esquíos', foi anunciado este venres pola delegada territorial da Xunta na Coruña, Belén do Campo, durante unha visita á actual casa niño O Pícaros, na que estivo acompañada polo alcalde, Fernando Pérez.
A nova instalación forma parte da última convocatoria autonómica de axudas para a creación de cinco casas niño en Galicia, que incorporarán un total de 25 prazas gratuítas. Dous destes recursos estarán na provincia da Coruña, nos concellos de Vilasantar e Vilarmaior.
Para a posta en marcha e o funcionamento destes dous centros, a Xunta prevé destinar case 121.000 euros. Desa cantidade, arredor de 91.000 euros corresponden a axudas para o funcionamento e outros 30.000 euros a investimentos necesarios para a súa apertura.
As casas niño ofrecen atención gratuíta durante oito horas ao día e once meses ao ano. Cada instalación pode atender un máximo de cinco menores e está destinada a concellos de menos de 5.000 habitantes. Trátase dun modelo de atención á primeira infancia pensado para facilitar a conciliación das familias nos municipios rurais.
Coa incorporación dos dous novos recursos, a comarca de Betanzos contará con sete casas niño: dúas en Vilasantar, dúas en Vilarmaior e unha en cada un dos concellos de Irixoa, Aranga e Paderne. Segundo os datos facilitados pola Xunta, cinco destes centros xa están en funcionamento.
No conxunto da provincia da Coruña, a rede alcanzará as 19 casas niño, das que 17 están operativas na actualidade. O Goberno galego sinala que destina máis de 1,6 millóns de euros ao mantemento destes 17 recursos durante o período 2025-2028.
A convocatoria deste ano incorpora tamén unha axuda complementaria de 150 euros semanais para as casas niño durante as baixas por maternidade ou paternidade da persoa responsable do servizo, co obxectivo de favorecer a continuidade da atención.