Vilasantar celebra este sábado o Día da Bici cun percorrido de oito quilómetros
O Concello de Vilasantar celebra este sábado, 18 de xullo, unha nova edición do Día da Bici, unha actividade dirixida a fomentar a práctica deportiva, a mobilidade sostible e o desfrute da bicicleta en familia.
A xornada comezará coa recollida de camisetas ás 10.30 horas na Casa do Concello, mentres que a saída da marcha está prevista para as 11.00 horas. As persoas participantes realizarán un percorrido aproximado de oito quilómetros.
Desde o Concello lembran que o uso do casco é obrigatorio durante todo o traxecto e recomendan levar auga para manterse hidratado, así como aplicar crema solar debido ás previsións de altas temperaturas.
Ao remate da actividade celebrarase un sorteo de material deportivo entre todas as persoas participantes, poñendo o broche final a unha iniciativa que busca promover hábitos de vida saudables e incentivar o uso da bicicleta como medio de transporte e de lecer.