Unha viaxe polos cinco sentidos para descubrir os recunchos naturais de Miño
Coñecer a paisaxe dun territorio a través da vista, o oído, o olfacto, o tacto e o gusto é a proposta do ciclo 'Miño a través dos sentidos', que este domingo celebrou a súa primeira actividade coa participación de persoas interesadas en descubrir dun xeito diferente o patrimonio natural e paisaxístico do municipio.
A primeira ruta desenvolveuse pola Senda dos Sentidos, onde os participantes estiveron acompañados polos arquitectos e paisaxistas responsables do proxecto. Durante o percorrido puideron coñecer os criterios ambientais, paisaxísticos e de deseño que se tiveron en conta para crear este espazo.
A iniciativa está promovida polo Concello de Miño e conta co financiamento do Colexio Oficial de Arquitectos de Galicia (COAG), a través da súa convocatoria de actividades culturais.
Tres novas rutas ata setembro
O programa continuará durante as próximas semanas con outras tres visitas guiadas polos Senderos Azuis do municipio. A seguinte terá lugar o 30 de agosto, coa Ruta dos Muíños do río Medio.
A programación continuará o 20 de setembro coa Ruta das Marismas do Baxoi e rematará o 27 de setembro coa Senda dos Muíños do río Xarío.
Con este ciclo, a proposta pretende achegar á cidadanía os espazos naturais do municipio desde unha perspectiva diferente, permitindo coñecer os seus valores paisaxísticos e ambientais e, ao mesmo tempo, descubrir como foron deseñados e postos en valor.