Unha proposta de Bono Deporte busca aliviar a recente suba de tarifas da piscina en Carral
Tras a aprobación no último pleno extraordinario dunha subida nas tarifas das instalacións deportivas e da piscina municipal de Carral, o grupo municipal socialista recolleu o malestar veciñal para presentar unha alternativa. A voceira do PSdeG, Patricia Blanco Fidalgo, rexistrou unha moción coa que pretende amortecer o impacto deste incremento fiscal sobre os residentes mediante a creación dun carné de descontos específico.
A proposta socialista ten como obxectivo prioritario que as persoas que pagan os seus impostos no municipio non sufran de cheo as consecuencias do encarecemento do servizo. Para logralo, a iniciativa insta ao Concello a deseñar o 'Bono Deporte Carral', unha tarxeta de identificación (que funcionará de xeito físico ou a través dunha aplicación móbil) para garantir prezos reducidos nas pistas e no vaso municipal. O proxecto tamén contempla bonificacións sociais para colectivos vulnerables como pensionistas, desempregados, estudantes, menores de idade e familias numerosas ou monoparentais.
Máis aló dos descontos directos para compensar as novas taxas, a moción socialista esixe a posta en marcha dun Plan Municipal de Fomento da Actividade Física no prazo de seis meses. Este documento recolle a necesidade de crear un programa gratuíto ao aire libre que inclúa adestramentos funcionais, iniciación ao atletismo ou as andainas saudables coñecidas como 'CoñeceCarral', deseñadas para dinamizar as fins de semana de forma saudable combinando o exercicio coa posta en valor do patrimonio natural do municipio.