Unha forte vaga de calor dispara o consumo de auga en Vilamaior e pon en risco o abastecemento municipal
A suba xeral das temperaturas asociada á actual vaga de calor está a poñer en xaque os servizos básicos de distribución hídrica en varios puntos da comarca. O Concello de Vilamaior emitiu un bando urxente para apelar á responsabilidade da veciñanza ante o incremento crítico detectado no consumo de auga potable ao longo das últimas xornadas, unha situación que ameaza de xeito directo a estabilidade do subministro xeral.
Segundo os datos oficiais facilitados polos servizos técnicos municipais, durante as xornadas do sábado e do domingo rexistrouse un pico de demanda que superou os 300.000 litros diarios. Esta cantidade excede a capacidade máxima de entrega hídrica coa que conta a rede local, o que obrigou ás autoridades a lanzar unha voz de alarma. Os principais causantes deste desaxuste son o uso de auga da traída pública para o rego de hortas e xardíns, así como o enchido de piscinas particulares e outras actividades de recreo de carácter privado.
Desde o consistorio recalcan que estes niveis de gasto non son sostibles no tempo se as condicións meteorolóxicas se prolongan durante os vindeiros días. O aviso municipal incide especialmente no perigo que supoñen os regos nocturnos, que baleiran os depósitos de cabeceira e impiden a súa correcta recuperación para o consumo doméstico do día seguinte. Por este motivo, pídese a máxima colaboración cidadá para realizar un uso restrito e consciente do recurso co obxectivo de evitar ter que recorrer a cortes selectivos ou a restricións severas na presión da rede nas vindeiras datas.