Un obradoiro en Arteixo ensinará a mellorar a alimentación e os hábitos saudables
Arteixo acollerá o sábado 9 de maio un obradoiro dedicado á alimentación antiinflamatoria e aos hábitos saudables, unha proposta pensada para persoas interesadas en mellorar o seu benestar a través da nutrición e dun estilo de vida máis consciente.
A actividade desenvolverase no Parque Municipal de Monticaño, en Pastoriza, en horario de 11.00 a 14.00 horas. O curso terá un nivel de iniciación e estará impartido por Aránzazu Fernández, nutricionista terapéutica.
O obxectivo do taller é achegar ás persoas participantes os principios básicos dunha alimentación antiinflamatoria, aprender a identificar alimentos beneficiosos e coñecer que hábitos diarios poden contribuír a mellorar a saúde xeral. Tamén se abordará o papel da inflamación no organismo e os factores que poden favorecela, como a alimentación, o estrés, o sedentarismo ou a falta de descanso.
O programa inclúe contidos sobre microbiota intestinal, alimentación consciente e intuitiva, alimentos antiinflamatorios e proinflamatorios, organización dunha dieta saudable e estratexias para manter hábitos sostibles no tempo. Ademais, trataranse técnicas sinxelas para a xestión do estrés, como a respiración ou a atención plena.
O obradoiro conta con 15 prazas, que se cubrirán por orde de inscrición. Terán prioridade as persoas empadroadas en Arteixo, así como os clientes de SUMARTE, do Servizo Municipal de Augas e de BiciArteixo. As solicitudes que queden sen praza poderán ser convocadas para unha próxima edición do curso.
O prezo será de 15 euros para persoas empadroadas en Arteixo, clientes de SUMARTE e colectivos asimilados, mentres que a inscrición xeral terá un custo de 25 euros.