Un novo servizo de limpeza viaria reforzará a atención nas rúas de Culleredo con 19 profesionais
Culleredo contará cun novo servizo de limpeza viaria para todo o termo municipal tras a adxudicación do contrato por 1.455.633,67 euros ao ano á UTE formada por Valoriza Servicios Medioambientales e Hallkuss Corporation.
A prestación terá inicialmente unha duración dun ano e servirá como paso previo a un contrato de maior duración, previsto por dez anos, cuxos pregos e condicións están sendo preparados polos servizos técnicos municipais.
O novo modelo busca ampliar as tarefas de limpeza e conservación do espazo público, combinando diferentes sistemas de intervención en función das características de cada zona. O municipio quedará dividido en cinco niveis de intensidade, determinados por factores como o volume de peóns ou a presenza de áreas comerciais.
Máis medios para a limpeza das rúas
O servizo combinará varrido manual e mecánico, baldeo con auga a presión, retirada de follas e control da vexetación espontánea. Tamén se reforzará a atención durante feiróns, festas e outros eventos públicos.
Entre os medios materiais adscritos en exclusiva ao municipio figuran tres varredoras mecánicas de gran capacidade, un camión baldeador cunha cisterna de polo menos 7.000 litros, unha máquina decapadora de beirarrúas, tres equipos de hidrolavado a presión, furgóns, sopradoras ergonómicas e desbrozadoras manuais.
O contrato incorpora ademais unha bicicleta eléctrica tipo triciclo, pensada para realizar repasos rápidos en zonas peonís ou en lugares de difícil acceso.
No apartado de persoal, a prestación contará cun cadro mínimo de 19 profesionais.
Vertidos, pintadas e actuacións ante xeadas
O novo servizo tamén asumirá tarefas que van máis alá da limpeza ordinaria das rúas. Entre elas estará o esparexido manual e mecánico de sal durante os episodios de xeadas, así como a eliminación de grafitis en fachadas e mobiliario urbano.
A empresa deberá encargarse tamén da retirada inmediata de vertidos incontrolados e da recollida de animais mortos nun prazo inferior a 24 horas.
Outra das tarefas previstas será o lavado periódico e o mantemento integral da rede municipal de papeleiras.
O Concello establece ademais criterios ambientais para a maquinaria empregada. Segundo as condicións da contratación, todos os vehículos e a maquinaria pesada deberán ser eléctricos ou contar coa etiqueta ambiental ECO, co obxectivo de reducir as emisións contaminantes e o impacto acústico.
Unha vía directa para comunicar incidencias
O contrato contempla tamén un sistema específico de atención á cidadanía. A empresa habilitará vías de contacto por teléfono, web e correo electrónico, ademais dun rexistro oficial das incidencias comunicadas polos veciños.
As queixas e peticións veciñais deberán recibir unha resposta motivada e por escrito nun prazo máximo de sete días naturais, de acordo co establecido nas condicións do servizo.
O alcalde de Culleredo, José Ramón Rioboo, sinala que o obxectivo municipal é contar cunha prestación que dea resposta ás necesidades de limpeza de todo o municipio e que combine eficiencia na organización, calidade ambiental e uso de enerxías menos contaminantes.