Un novo impulso estatal reforza a Feira de Cultura En CaMiño
A Feira de Cultura En CaMiño contará de novo co apoio do Ministerio de Cultura. A convocatoria estatal de subvencións para a promoción da lectura e das letras españolas vén de conceder ao proxecto miñense unha axuda de 20.000 euros, unha cantidade que supera en máis do dobre a recibida na edición anterior.
A concesión sitúa a Miño entre os tres únicos municipios galegos beneficiarios desta liña de financiamento, na que foron seleccionados 99 concellos de toda España. O proxecto presentado polo Concello acadou nesta ocasión unha valoración de 59 puntos, cinco máis que en 2025.
Na resolución valorouse especialmente a orixinalidade da proposta e a súa capacidade para achegar a lectura á infancia, á adolescencia, á mocidade e tamén a colectivos de atención preferente. O apoio ministerial permitirá reforzar a programación da quinta edición da Feira de Cultura En CaMiño, unha iniciativa que busca levar os libros e a creación literaria a diferentes espazos e públicos do municipio.
As próximas actividades comezarán o 16 de xuño no Centro de Día de A Regueira, onde as persoas usuarias poderán gozar do espectáculo 'A maxia dos libros', a cargo do Mago Errante.
Durante a primeira quincena de xullo, a programación trasladarase tamén aos campamentos municipais. O alumnado do campamento de conciliación participará en encontros coa escritora Marta Villar, mentres que as persoas inscritas no campamento deportivo recibirán exemplares de literatura xuvenil.