Últimos días para anotarse nos campamentos de verán de Arteixo
As familias de Arteixo teñen ata este luns 18 de maio para solicitar praza nos campamentos de verán organizados pola Concellería de Igualdade, Servizos Sociais, Sanidade e Educación. A programación busca facilitar a conciliación durante as vacacións escolares e desenvolverase por quendas desde o 22 de xuño ata o inicio do curso en setembro.
A oferta principal é o Campamento Concilia, dirixido a nenas e nenos de segundo ciclo de Educación Infantil e Primaria. Este ano terá como fío condutor o cine, con actividades inspiradas na aventura, a maxia, os misterios, a música e o universo Minecraft.
Tamén haberá propostas para adolescentes de 13 a 16 anos, con actividades de música urbana, deportes alternativos, cociña creativa, xogos en equipo e experiencias na natureza. Ademais, o Concello manterá unha programación específica para persoas con diversidade funcional maiores de 7 anos, con arte, deportes adaptados, música, cine, actividades sensoriais e contacto co medio natural.
Os campamentos estrutúranse en diferentes quendas ao longo do verán. Para facilitar a organización das familias, a programación incorpora servizos complementarios como madrugadores con almorzo e xantar, adaptándose así ás necesidades de conciliación durante o período non lectivo.
As listaxes provisionais de persoas admitidas publicaranse o 21 de maio. O pagamento das primeiras quendas poderá realizarse entre o 25 e o 29 de maio. As persoas interesadas poden consultar toda a información na sede electrónica municipal ou acudir ao Departamento de Educación, situado na avenida dos Bosques, número 16 baixo.