Trinidad Palacios presenta a súa candidatura á Alcaldía da Coruña
Trinidad Palacios presentou este sábado no Centro Cívico Monte Alto a súa candidatura á Alcaldía da Coruña por Movemento Sumar Galicia, nun acto no que defendeu a apertura dunha nova etapa política na cidade. A candidata situou entre os seus obxectivos “recuperar a ambición, a vangarda e o carácter progresista da Coruña” e construír unha alternativa de goberno para as eleccións municipais de 2027.
Palacios, coruñesa de nacemento, repasou durante a súa intervención parte da súa traxectoria persoal e profesional, desde o seu paso polo ámbito da consultoría ata os últimos oito anos como traballadora sociosanitaria no Servizo de Atención a Domicilio no Fogar da Coruña.
A candidata cuestionou diversas decisións do actual goberno municipal de Inés Rey e formulou preguntas ao resto das forzas políticas representadas en María Pita. Entre os asuntos abordados referiuse ao incremento salarial da alcaldesa ao chegar ao goberno, ás retribucións no executivo municipal, ao modelo de aparcadoiros privados, aos beneficios da empresa de autobuses e á xestión de servizos como o Servizo de Axuda no Fogar ou as escolas infantís.
“Non se trata dunha cuestión persoal, senón dunha cuestión de criterio político e de como cremos que debe gobernarse A Coruña”, afirmou Palacios, que presentou fronte ás súas críticas unha serie de propostas para o modelo de cidade que pretende impulsar.
Entre as medidas expostas inclúe a creación dunha empresa pública de coidados, un parque municipal permanente de alugueiro a prezos accesibles e o avance cara a un modelo público de transporte urbano. Tamén propón ampliar BiciCoruña ao conxunto dos barrios e revisar determinados desenvolvementos urbanísticos que, segundo o seu criterio, non encaixan co modelo de cidade que defende.
Palacios asegurou ademais que Movemento Sumar Galicia pretende concorrer cun proxecto propio ás municipais de 2027. “Non vimos para ser a muleta de ninguén. Vimos para gobernar e para ser decisivos en 2027”, sinalou. A candidata tamén expresou a súa oposición a un eventual goberno do PP de Miguel Lorenzo con Vox e defendeu fronte a esa posibilidade unha Coruña “aberta, plural, diversa e tolerante”.
Ao remate da súa intervención, fixo un chamamento ás forzas do espazo progresista, ás persoas independentes, ao tecido asociativo e á sociedade civil para participar na elaboración dun proxecto común que permita que “A Coruña recupere a súa ambición, a súa capacidade de estar á vangarda e o seu carácter progresista”.
Pola súa banda, o secretario xeral de Movemento Sumar Galicia, Paulo Carlos López, vinculou a presentación coa expansión da organización en Galicia e coa intención de presentar candidaturas nas cidades galegas para concorrer ás alcaldías e formular alternativas de goberno.
López situou a vivenda entre as principais preocupacións da cidadanía e referiuse á tramitación do novo real decreto estatal nesta materia. Reclamou ao PSOE medidas que, ao seu xuízo, sexan suficientemente ambiciosas e sinalou que o PP tamén ten responsabilidades neste ámbito a través da Xunta de Galicia.
O secretario xeral defendeu igualmente a iniciativa lexislativa popular impulsada por Movemento Sumar Galicia para declarar toda Galicia como zona tensionada e lembrou que A Coruña e Santiago de Compostela xa están declaradas mercados residenciais tensionados. Tamén reclamou medidas sobre as vivendas de uso turístico e unha ampliación da vivenda de protección oficial que garanta que estas propiedades manteñan a súa protección e non pasen posteriormente ao mercado libre.
López sinalou que estas políticas deben prestar especial atención ás persoas con maiores dificultades para afrontar os gastos mensuais e acceder a un alugueiro a prezos asumibles, situando o dereito á vivenda como unha das prioridades do proxecto político da formación.
Na presentación tamén participou a presidenta de Movemento Sumar Galicia e portavoz do Grupo Plurinacional Sumar no Congreso, Verónica Martínez Barbero, quen expresou o apoio da organización a Trinidad Palacios e defendeu a creación dun espazo político amplo na Coruña.
Martínez Barbero apostou por incrementar as alianzas entre as forzas da esquerda e afirmou que “as esquerdas xuntas podemos facer máis cousas pola xente”. A vivenda foi tamén un dos ámbitos que sinalou como prioritarios, reclamando ao PSOE, ao PSdeG e á alcaldesa, Inés Rey, que definan a súa posición ante a crise habitacional.
A portavoz de Sumar mencionou o caso de Mari Carmen, unha muller de 87 anos que sufriu un intento de desafiuzamento en Madrid, como exemplo das situacións relacionadas coa vivenda que, segundo advertiu, tamén se producen en Galicia e na Coruña. Neste contexto, reclamou ao Goberno central novas medidas de protección para familias e persoas vulnerables, unha actuación contra as prácticas especulativas no mercado inmobiliario, unha prórroga reforzada dos alugueiros e a recuperación da vivenda de Mari Carmen mediante a súa expropiación.
A presentación de Trinidad Palacios supón, segundo Movemento Sumar Galicia, o inicio da construción dunha alternativa de goberno para A Coruña de cara a 2027, cun programa centrado nos servizos públicos, a vivenda, os coidados, a mobilidade sostible e o modelo urbano.