Traballadoras do comercio coruñés trasladan a súa acampada a Santiago
A CIG responsabilizou á patronal da provincia da Coruña e a Inditex do bloqueo das negociacións para acadar un acordo marco interprofesional galego no sector do comercio. A central sindical sostén que a negativa do empresariado coruñés está a impedir blindar os convenios provinciais fronte á aplicación do convenio estatal ARTE e garantir o mantemento das condicións laborais actuais das traballadoras e traballadores galegos.
A denuncia produciuse despois da acampada que traballadoras do sector instalaron ás portas da Confederación de Empresarios de Galicia (CEG) en Santiago de Compostela. A protesta, que fora trasladada á capital galega tras permanecer máis de dúas semanas diante da sede da Confederación de Empresarios da Coruña, foi desaloxada pola Policía Local durante a madrugada.
Segundo explicou a delegada da CIG-Servizos, Lucía Domínguez, a mobilización serviu para confirmar as sospeitas que o sindicato viña manifestando nos últimos meses sobre a orixe do bloqueo das negociacións. A representante sindical asegurou que unha conversa mantida co presidente da CEG, Juan Vieites, ratificou que a oposición á sinatura dun acordo marco galego procede fundamentalmente da patronal coruñesa.
A central sindical sinala directamente ao presidente da Confederación de Empresarios da Coruña, Antonio Fontenla, á secretaria xeral Marina Graña e a Pablo Francesch, director de relacións laborais de Inditex e vicepresidente da patronal estatal ARTE, como referentes desta posición contraria ao acordo galego.
Desde a CIG consideran que a negativa a establecer este marco autonómico impide protexer os convenios provinciais e evita que as traballadoras galegas queden blindadas fronte ás condicións que contempla o convenio estatal. Neste sentido, Domínguez criticou especialmente a postura de Inditex, á que acusou de non garantir en Galicia as condicións laborais que si foron preservadas noutros territorios, como o País Vasco.
O sindicato tamén denunciou que a patronal da Coruña continúa sen constituír a mesa de negociación do convenio provincial do comercio vario, caducado desde o pasado 31 de decembro de 2025. Mentres noutras provincias galegas os convenios xa foron negociados e renovados, a organización asegura que na Coruña non houbo resposta ás peticións sindicais para iniciar o proceso negociador.
A CIG advirte de que a aplicación do convenio estatal ARTE suporía un retroceso nas condicións laborais conquistadas nos convenios provinciais. Entre as consecuencias, alerta da creación de diferenzas entre o persoal actual e as novas contratacións, con salarios máis baixos e menos dereitos para quen se incorpore ás empresas no futuro.
Segundo o sindicato, este convenio podería provocar perdas salariais de entre 2.000 e 5.000 euros anuais nalgunhas provincias, a desaparición de determinados complementos por antigüidade, unha maior dispoñibilidade para traballar en domingos e festivos e un incremento da flexibilidade empresarial na organización das xornadas laborais.
A organización sindical asegura que a presión exercida polas mobilizacións xa permitiu modificar algúns dos aspectos máis prexudiciais da proposta inicial, aínda que insiste en que continuará a súa oposición á estatalización da negociación colectiva mentres non existan garantías para a protección dos convenios galegos.
Neste contexto, Lucía Domínguez avanzou que a CIG continúa preparando accións xurídicas para tratar de evitar a aplicación do convenio estatal en Galicia e seguirá reclamando unha resposta das organizacións empresariais ás demandas formuladas durante os últimos meses.
Ao mesmo tempo, o sindicato confirmou que manterá as mobilizacións nas próximas semanas. Aínda que non existen convocatorias pechadas, nas asembleas do sector está a debaterse a posibilidade de impulsar novas protestas e incluso folgas coincidindo coa campaña de rebaixas, unha decisión que, segundo subliñan, dependerá finalmente das traballadoras e traballadores do comercio galego.