Tenis, pádel e patinaxe enchen de deporte o verán en Miño
O Concello de Miño xa prepara a programación das Escolas Deportivas Municipais para o verán de 2026, unha proposta pensada para que nenos, nenas e adolescentes poidan manterse activos durante as vacacións con actividades ao aire libre e en instalacións municipais. A oferta inclúe tenis, pádel e patinaxe, todas elas nas pistas de Galea.
O prazo de inscrición abrirase o venres 26 de xuño. As persoas interesadas deberán presentar o formulario na oficina de deportes do Concello. Todas as actividades estarán suxeitas ao aforo dispoñible e á organización dos grupos.
A escola de tenis estará dirixida a participantes a partir dos 7 anos. As clases serán os martes e xoves, de 10.00 a 11.30 horas, con catro quendas repartidas entre xullo e agosto. A primeira será os días 7, 9, 14 e 16 de xullo; a segunda, os días 21, 23, 28 e 30 de xullo; a terceira, os días 4, 6, 11 e 13 de agosto; e a cuarta, os días 18, 20, 25 e 27 de agosto.
O pádel estará aberto a rapaces e rapazas de 6 a 17 anos. Neste caso, as clases celebraranse os luns e mércores, de 13.00 a 14.00 horas. As quendas serán os días 6, 8, 13 e 15 de xullo; 20, 22, 27 e 29 de xullo; 3, 5, 10 e 12 de agosto; e 17, 19, 24 e 26 de agosto.
A programación complétase coa patinaxe, para nenos e nenas a partir dos 4 anos. As sesións serán os mércores e venres, con grupo de iniciación de 10.00 a 11.00 horas e grupo avanzado de 11.00 a 12.00 horas. As quendas desenvolveranse os días 8, 10, 15 e 17 de xullo; 22, 24, 29 e 31 de xullo; 5, 7, 12 e 14 de agosto; e 19, 21, 26 e 28 de agosto.
O prezo de cada quenda será de 13,20 euros. Para obter máis información, as familias poderán contactar co departamento municipal de deportes a través do teléfono 604 004 439 ou do correo electrónico deportes@concellodemino.gal.