Seis traballadoras de O Berce levan meses sen cobrar e denuncian quedar atrapadas nun limbo laboral
Seis traballadoras da escola infantil O Berce, en Arteixo, levan desde abril sen percibir os seus salarios e continúan vinculadas á empresa a pesar de que o centro xa foi desmantelado. A situación levou as empregadas a concentrarse este luns para reclamar o pagamento inmediato das cantidades pendentes e unha solución que lles permita saír dunha situación laboral que consideran insostíbel.
A denuncia parte da CIG, que explica que a propietaria da empresa Os Gosendes comunicou en xullo a súa intención de pechar a escola. Porén, segundo o sindicato, en lugar de rescindir os contratos e liquidar as débedas salariais, as traballadoras recibiron inicialmente un permiso retribuído durante o mes de agosto, posteriormente ampliado a setembro.
O problema é que, mentres as empregadas continúan formalmente contratadas, xa non existe o centro no que desenvolver o seu traballo, xa que as instalacións foron desmanteladas. Segundo a CIG, tampouco poden acceder á prestación por desemprego ao non dispoñer dunha carta de despedimento.
A situación, segundo relatan as propias traballadoras, non comezou este ano. Os atrasos no pagamento das nóminas viñan producíndose desde finais de 2024, aínda que ata agora non chegaran a acumular máis de tres meses de débeda. O escenario tería empeorado a partir de novembro de 2025, cando, sempre segundo a versión trasladada polo sindicato, unha representante legal da empresa comunicoulles a suspensión dos salarios durante dous meses.
Foi entón cando as traballadoras acudiron á Inspección de Traballo, ante os atrasos salariais e a incerteza sobre o futuro da escola.
Un conflito que acabou afectando ao persoal
A CIG asegura que a situación foi provocando un deterioro progresivo do ambiente laboral e denuncia tamén episodios de presión psicolóxica sobre as empregadas. O sindicato sinala que algunhas delas chegaron a sufrir consecuencias sobre a súa saúde e que catro das seis traballadoras estiveron de baixa médica.
Finalmente, o 31 de xullo, a empresa comunicou o peche da escola por motivos económicos que, segundo a CIG, non foron xustificados ante o persoal. As traballadoras pasaron así ao permiso retribuído durante agosto e posteriormente durante setembro, mentres os salarios continuaban sen chegar.
Agora reclaman que se regularice a situación e que se lles permita acceder ás prestacións que lles correspondan. As empregadas xa presentaron novas denuncias ante a Inspección de Traballo e, ademais, solicitaron xudicialmente a rescisión dos seus contratos.
Coa concentración deste luns, as traballadoras quixeron facer visible un conflito que, segundo denuncian, leva meses sen unha solución. A súa principal demanda é clara: cobrar os salarios pendentes e deixar atrás unha situación na que, segundo a CIG, nin teñen un posto ao que acudir nin poden acceder ao desemprego ao continuar formalmente contratadas.