Sada abre seis liñas de axudas para apoiar a educación, o deporte e a actividade cultural en 2026

O Concello de Sada abriu o prazo para solicitar as diferentes liñas de axudas e subvencións municipais correspondentes a 2026, destinadas a apoiar as familias e impulsar a actividade educativa, deportiva, cultural e asociativa do municipio. A convocatoria inclúe seis modalidades, con prazos e condicións específicas en función do tipo de beneficiario.
No ámbito educativo, as familias poderán optar ás bolsas de comedor escolar para o curso 2026/2027, concedidas en función da renda familiar. O prazo de solicitude é de 15 días hábiles e permanece aberto do 12 de novembro ao 2 de decembro. Tamén se convocan axudas para os desprazamentos con fins escolares durante 2026, cun período de presentación de solicitudes de 15 días naturais, entre o 12 e o 26 de novembro.
Axudas para entidades e actividades locais
O programa municipal reserva tamén unha liña de subvencións para as entidades deportivas de Sada, correspondentes ao ano 2026. Neste caso, o prazo será de dez días hábiles, do 18 de novembro ao 1 de decembro.
A convocatoria inclúe ademais apoio económico para a organización de actividades culturais e para a celebración das festas patronais nas parroquias. Ambas as dúas modalidades contan cun prazo de 15 días naturais, entre o 18 de novembro e o 2 de decembro.
As asociacións de nais e pais de alumnos (ANPAS) dos centros escolares tamén poderán solicitar subvencións para financiar a súa actividade anual. O prazo de presentación será igualmente de 15 días naturais, do 18 de novembro ao 2 de decembro.
Consulta das bases e requisitos
As persoas, entidades e colectivos interesados poden consultar as bases reguladoras de cada convocatoria, os requisitos para acceder ás axudas e a documentación que deben presentar na páxina web municipal, no apartado de axudas e subvencións.
O Concello lembra a importancia de revisar as condicións específicas de cada liña, xa que os prazos de solicitude varían en función da modalidade e do tipo de subvención.